Olar osy ýaqytqa deıin 7 tiri adamdy tapty.
Prezıdent Qasym-Jomart Toqaev Túrkıaǵa barǵan qutqarýshylardyń memlekettik nagradaǵa usynylatynyn málimdedi, dep habarlaıdy Almaty-akshamy.kz Aqordaǵa silteme jasap.
Búgin Memleket basshysy qutqarýshylardy daıyndaıtyn Málik Ǵabdýllın atyndaǵy Azamattyq qorǵaý akademıasyna bardy. Kýrsanttardyń aldynda sóz sóılegen Toqaev Túrkıadaǵy zilzaladan keıin qutqarý sharalaryna qatysyp jatqan qazaqstandyq mamandardyń memlekettik nagradaǵa usynylatynyn aıtty.
"Jaqynda Túrkıada joıqyn jer silkinisi bolǵanyn bilesizder. Meniń tapsyrmammen baýyrlas Túrkıa eline qutqarýshylar jáne dárigerler jiberildi. Olardyń arasynda Aqmola oblysynyń mamandary da bar, ıaǵnı 18 adam. Bizdiń qutqarýshylar birneshe adamdy aman alyp shyqty. Túrkıada kúndiz-túni jumys istep jatqan azamattarymyzǵa alǵys aıtamyn! Túrkıadan aman-esen oralǵan soń olardy mindetti túrde marapattaımyz", - dedi Toqaev.
Aıta keteri, Túrkıaǵa aldymen birinshi eshelonmen 41 qazaqstandyq qutqarýshy bardy. Odan keıin taǵy 60 maman zilzaladan keıingi qutqarý sharalaryna attandy. Osy ýaqytqa deıin olar 7 tiri adamdy tapty. Budan bólek, qaıtys bolǵan 80 adamnyń denesin alyp shyqty.