Qazaqstan Reseı munaıynyń QHR-ǵa tranzıtinen $1,7 mlrd astam tabys tabady
Qazaqstan Respýblıkasy Parlamentiniń Májilisi sársenbide ótken jalpy otyrysta "2013 jylǵy 24 jeltoqsandaǵy Qazaqstan Respýblıkasynyń Úkimeti men Reseı Federasıasynyń Úkimeti arasyndaǵy Qazaqstan Respýblıkasynyń aýmaǵy arqyly Qytaı Halyq Respýblıkasyna reseılik munaıdy tasymaldaý salasyndaǵy yntymaqtastyq týraly kelisimge ózgerister engizý týraly hattamany ratıfıkasıalaý týraly» zań qabyldady.
Qazaqstannyń energetıka mınıstri Almasadam Sátqalıev depýtattarǵa 2013 jylǵy Kelisimge engizilgen ózgerister týraly aıtyp berdi.
Atap aıtqanda, mınıstrdiń aıtýynsha, tranzıt kólemi, tarıfter jáne munaı tranzıti úshin esep aıyrysý boıynsha ózektendirý, sondaı-aq Kelisimdi 2033 jylǵa deıingi on jyldyq kezeńge reseılik munaı tranzıtin jyl saıyn 10 mln tonna kóleminde uzartý kózdelip otyr. Munaı aıdaý tarıfi tonnasyna 15 AQSH dollary deńgeıinde bekitildi.
Sondaı-aq, Kelisimge túzetýlermen TON – 2 (Týımazy – Omsk-Novosıbırsk-2) marshrýtynyń ýchaskesin kelisimge engizý jáne $2,1 tarıfti bekitý kózdelgen.
Kelisimdi uzartý PMHZ-n Omby-Pavlodar munaı qubyry arqyly QR túsetin munaımen júkteýdi qamtamasyz etedi.
"2024 jyldan 2033 jylǵa deıingi kezeńde Reseı munaıynyń Qazaqstan aýmaǵy arqyly QHR - ǵa tranzıti úshin eki ýchaske boıynsha kútiletin túsim 1.710.000.000 AQSH dollaryn quraıdy", - dedi A.Sátqalıev depýtattarǵa qujatty usyna otyryp.
Esterińizge sala keteıik, joǵaryda atalǵan kelisimge 2013 jylǵy 24 jeltoqsanda qol qoıylyp, 2014 jylǵy shildede ratıfıkasıalandy. Osy Kelisimniń qoldanylý merzimi 2024 jylǵy 1 qańtarǵa deıin aıqyndaldy.
2017 jyly taraptar tranzıtti jylyna 7 mln tonnadan jylyna 10 mln tonnaǵa deıin ulǵaıtý týraly ýaǵdalastyqtarǵa qol jetkizdi.
Osyǵan baılanysty Taraptar Kelisimdi 2024 jyldan 2033 jylǵa deıin uzartýǵa ózara múddelilik bildirdi jáne 2013 jyly qol qoıylǵan kelisimge ózgerister engizý boıynsha tıisti kelissózderge kiristi.
Anyqtama: 2014 jyldan 2023 jylǵa deıingi kezeńde Qazaqstan aýmaǵy arqyly Reseı munaıynyń QHR-ǵa jalpy tranzıti 90.899.271 tonnany qurady. Jalpy kiris 1.327.000.000 (bir mıllıard úsh júz jıyrma jeti mıllıon) AQSH dollaryn qurady.
Zańdy QR Parlamenti Senaty qaraıtyn bolady.