Qazaqstan – zaıyrly memleket.
Qazaqstan Prezıdenti Qasym-Jomart Toqaev jastarǵa durys baǵyt-baǵdar berý asa mańyzdy ekenin atap ótti. Bul týraly memleket Prezıdenti Atyraý oblysy jurtshylyǵymen kezdesý barysynda aıtty, dep habarlaıdy Almaty-akshamy.kz Aqordanyń baspasóz qyzmetine silteme jasap.
«Atyraý – Qazaq eliniń Eýropaǵa shyǵar qaqpasy. Uly Jibek jolynyń soltústik tarmaǵy osy ólke arqyly ótkeni tarıhtan belgili. Qala ortalyǵyndaǵy kópir Azıa men Eýropany jalǵap tur. Munyń zor sımvoldyq máni bar. Bir sózben aıtqanda, elimiz túrli órkenıetter toǵysqan toǵyz joldyń torabynda ornalasqan. Sondyqtan, qazaqtyń jerin ejelgi zamannan túrli dinı nanym ókilderi mekendegen. Halqymyz dinı ustanymyna qarap eshkimdi kemsitpegen. Bári tatýlyqta ómir súrgen. Men muny bekerge aıtyp otyrǵan joqpyn. Qazir jer júzinde bolyp jatqan túrli qaqtyǵystardyń negizgi sebepteriniń biri – dinı alaýyzdyq. Biz elimizde tynyshtyq pen turaqtylyq bolǵanyn tileımiz», - dedi Toqaev seısenbidegi Atyraý oblysy jurtshylyǵymen kezdesýinde.
Ol atap ótkendeı, Qazaqstan – zaıyrly memleket.
«Konstıtýsıamyzda din bostandyǵyna kepildik berilgen. Biraq, zaıyrly jáne tózimdi, tolerantty bolý degenimiz bárine kóz juma qarap, jaıbaraqat otyrý degen sóz emes. Biz eldiń qaýipsizdigi men tutastyǵyna nuqsan keltirýge eshqashan jol bermeımiz. Radıkaldy aǵymdar men dinı separatızmge ortamyzda oryn joq. Babalarymyz ǵasyrlar boıy ıslam dinin ustanǵan. Sharıǵattyń sharttary men halqymyzdyń ádet-ǵurpy úndesken dástúrli ata dinimiz bar. Onyń asyl qundylyqtary osy kúnge deıin ultymyzdy uıystyryp, birligimizdi bekemdep keledi. Ata jolyn saqtap, dinimiz ben salt-dástúrimizdi berik ustaý – bizdiń perzenttik paryzymyz. Osy oraıda, jastarǵa durys baǵyt-baǵdar berý asa mańyzdy», - dedi memleket basshysy.