Qasym-Jomart Toqaev «Beıbitshilik pen quqyqqa negizdelgen bolashaq» atty konstıtýsıalyq sot tóreliginiń halyqaralyq forýmyna qatysýshylarmen kezdesti, - dep habarlaıdy Aqshamnews.kz tilshisi.
Basqosýǵa Venesıa komısıasynyń prezıdenti Kler Bazı Malorı, BAÁ Joǵarǵy federaldyq sotynyń tóraǵasy Muhammed Hamad Muhammed ál Badı ál Zahrı, Afrıka konstıtýsıalyq ıýrısdıksıa organdary konferensıasynyń tóraǵasy Lúk Malaba, Mońǵolıa Konstıtýsıalyq sotynyń tóraǵasy Baıasgalan Gýngaa qatysty.
Memleket basshysy elimizge saparmen kelgeni úshin meımandarǵa rızashylyǵyn bildirdi.
– Biz basqa memleketterdiń ozyq konstıtýsıalyq saıasatymen birge Venesıa komısıasynyń sheshýshi rólin jáne onyń úlgili zań tájirıbesin baǵalaımyz. Bul – demokratıa ınstıtýttarynyń damýyn aıqyndaý jáne adam quqyǵyna kepildik berý isindegi basty baǵdarymyz. Bıyl Konstıtýsıamyzdyń qabyldanǵanyna 30 jyl toldy. Osy oraıda, atalǵan qujattyń jahandyq syn-qaterler kezindegi áleýmettik úılesimdi, turaqtylyq pen qarqyndy damýdy qamtamasyz etetin negizgi qyzmetin atap ótkim keledi, – dedi Prezıdent.
Qasym-Jomart Toqaev elimizde qolǵa alynǵan aýqymdy saıası, ekonomıkalyq jáne konstıtýsıalyq reformalar jaıynda aıtty. Prezıdent Ata zańǵa engizilgen ózgerister ókildi bılik tarmaǵy men quqyq qorǵaý ınstıtýttarynyń rólin nyǵaıtyp, atqarýshy bıliktiń esep berý mindetin kúsheıtkenin jetkizdi. Qaıta jańǵyrǵan Konstıtýsıalyq sot ádil sot tóreligine keńinen jol ashty.
Memleket basshysynyń aıtýynsha, Qazaqstanda «Zań jáne tártip» qaǵıdaty iske asyrylyp jatyr. Quqyqbuzýshylyqqa qatysty jaza men jaýapkershilikti qatańdatýmen qatar halyqtyń quqyqtyq mádenıeti birtindep artyp keledi.