Tilendıev kóshesi, 2G mekenjaıynda osy zamanǵy ýrbanıstıkanyń qaǵıdasyn eskere otyryp, turǵyndardyń bastamasymen jasalǵan «jańa býyn aýlalary» jobasy iske asyryla bastady. Almaly aýdanynyń ákimi Arman Shamshınniń aıtýynsha, bul aýla abattandyrylǵan aýmaq qana emes, barlyq jastaǵy adamdarǵa yńǵaıly, qaýipsiz bolyp, tolyqqandy qoǵamdyq keńistikke aınalmaq. Arman Shamshın Almaty qalasynyń Óńirlik komýnıkasıalar qyzmeti uıymdastyrǵan baspasóz týry barysynda Tilendıev kóshesindegi aýladaǵy jumys barysyn tanystyrdy.
2023 jyly aýdan turǵyny Elena Pýshkova aýdan ákimdigine habarlasyp, aýlany «Halyq qatysatyn búdjet» baǵdarlamasyna kirgizýdi usynǵan. Osy kisiniń arqasynda aýla adam tanymastaı bolyp ózgerip otyr. 2015 jyly bir ret jóndelgenimen, ol joly azdaǵan ózgerispen shektelip, eleýli nátıje bergen joq. Endi bul jolǵy jobany jan-jaqty oılastyryp jasapty.
«Bizdiń turǵyndar óte belsendi, uıymshyl. Barlyǵymyz bul ıdeıany qoldap, balalarymyz ádemi aýlada oınasa eken dedik. Buryn munda bos jatqan úlken alań bolǵan. Ol aram shópke tolyp, qoqys jınalyp, las bolatyn. Balalar alańy da tarlyq etetin. Sondyqtan biz ózgeris kerek dep sheshtik te, ózgeris jasaǵymyz keldi. Qaıda júginerimizdi bilmeı, sodan «Halyq qatysatyn búdjet» jobasyn taptyq aqyry. Soǵan qatysyp, turǵyndar daýys berip, jobamyz jeńiske jetti. Qazir bári jaqsy, bári ádemi bolyp kele jatyr», – deıdi jobanyń avtory Elena Pýshkova.
Aldymen aýmaq tolyq tazartylyp, eski-qusqy men tozǵan dúnıeler alynyp tastalyp, aýla tolyǵymen asfálttalyp, ınjenerlik jeliler júrgizilgen. Arhıtektýralyq-josparlaý tujyrymdamasyna turǵyndardyń ózi aralasyp, onda aýlanyń logıstıkasy, jaqyn mańdaǵy abattandyrylǵan aımaqtar, jer bederi men túrli jastaǵy adamdardyń qajettiligi de eskerilgen.
«Buryn bizde bar bolǵany eki týrnık pen bos jatqan úlken jer bar edi. Aýlanyń jaǵdaıy óte nashar bolatyn. Biz ótinish berip, qazir tamasha aýla jasalyp jatyr: balalarǵa arnalǵan alań, oryndyqtar, ata-analar men analarǵa arnalǵan átkenshek, jasóspirimderge arnalǵan vorkaýt alańy salyndy. Aýla múlde jańa beınege enip keledi. Bul jerde turyp jatqanyma 30 jyl boldy, bundaı ózgeris bolady dep oılamappyn da. Osyndaı baǵdarlamalardy ózimiz tańdap, aýlamyzdyń qandaı bolaryn ózimiz sheshetinimiz óte keremet!», – dedi Elena Pýshkova.
Sonyń arqasynda osyndaı kópfýnksıaly joba dúnıege keldi. Eresekterge arnap demalys aımaǵy - 12 metrlik aǵash pergola ornatylady, munda kóleńkede demalyp, ońashalanýǵa bolady. Balalar alańy qaýipsiz jabynmen jabdyqtalyp, oıyn elementterimen qamtamasyz etiledi, onda kórshi jeke sektordaǵy balalar da oınaı alady. Aýmaǵy avtomatty sýarý júıesi arqyly kógaldandyrylyp, aǵash pen butalardy úılestirip ekkendikten jaǵymdy mıkroklımat qalyptaspaq. «Qaýipsiz aýla» tujyrymdamasy aıasynda jaryq berilip, kameralar da ornatylady.
«Aýmaq úlken – 50 sotyq. Biraq buryn tek shaǵyn bóligi ǵana paıdalanylatyn. Eski garajdar boldy, kólik te kóp edi, aram shóp basyp jatatyn. Endi bizde 30 kólikke arnalǵan arnaıy avtoturaq bolady. Belsendi aımaq, vorkaýt aımaǵyn salyp, qalqa ornatamyz, turǵyndar sportpen aınalysýy úshin. Ońasha otyryp, sóıleskisi keletin turǵyndarǵa arnalǵan arnaýly oryndar da bolady. 5 shaǵyn arhıtektýralyq formadan turatyn balalar alańy bolady. Barlyq jerde avtosýarý júıesi bolady, 150 buta egiledi, kógaldandyramyz. Bir aı, bir jarym aı ishinde bul jer áli óte ádemi bolyp ketedi», - dep tolyqtyrdy Almaly aýdanynyń ákimi Arman Shamshın.
Bul joba turǵyndardyń óz ortasyn ózgertýge baǵyttalǵan talpynysynan týyp otyr. «Azamattyń aýlasy» - bul turǵyndardyń aryz-ótinishin eskerip baryp qolǵa alǵan jaıly da qaýipsiz orta.