Almaly aýdanynda zamanǵa laıyq jalpy bilim beretin 1500 oryndyq jańa oqý ortalyǵynyń qurylysy aıaqtaldy. Raıymbek dańǵyly - 210 (Áýezov kóshesimen qıylysqan jerde) mekenjaıynda ornalasqan bul nysan «Jaıly mektep» ulttyq jobasynyń aıasynda «Samruk-Kazyna Construction» AQ men «Bazis Construction» JSHS-niń qoldaýymen salyndy.
Aýdanda shamamen 1 400 oryn jetispeı turǵandyqtan, mektep der kezinde paıdalanýǵa berilgen. Jańa oqý ornynyń qurylys barysyn Almaty qalasy Óńirlik komýnıkasıalar qyzmeti uıymdastyrǵan baspasóz týry aıasynda Almaly aýdanynyń ákimi Arman Shamshın tanystyrdy.
Qurylysy 2023 jyldyń jazynda bastalǵan mekteptiń negizgi jumystary, sonyń ishinde ishki árleý jumysy tolyǵymen bitken. Qazir ruqsat beretin qujattamasyn ázirlep jatyr. Tamyz aıynda oqýshylar mektepke kirip, 1 qyrkúıekte alǵashqy sabaq ótpek.
«Mekteptiń qurylysy bir jyl úsh aı ishinde júrgizildi. Ǵımarat úsh qabattan turady. Barlyq ınjenerlik jelige qosyldy, nysan 100% daıyn. Partalar, kompúterler men aqparattyq taqtalar sekildi qajetti jabdyqtyń bári qoıyldy. Nysan paıdalanýǵa berýge daıyn», - dedi «BCN Group» JSHS qurylys kompanıasynyń atqarýshy dırektory Erbol Turaıysov.
Úsh qabatty ǵımarattyń jalpy aýmaǵy shamamen 16 000 m², bul standartty mekteptermen salystyrǵanda 15–20%-ǵa artyq. Qurylystyń aýmaǵy – 2,53 gektar. Ǵımarat keńistigi bilim deńgeıine qaraı bólingen: oń jaq qanat bastaýysh mektepke arnalǵan, onyń jeke kireberisi, eki shaǵyn sportzaly, oqshaýlanǵan synyptary bar; sol jaq qanatta – negizgi jáne joǵarǵy synyptar ornalassa, ortalyǵynda 326 oryndy asqana men akt zaly bolady.
«Nysan jalpy 8 bloktan turady. Úshinshi blok – bul mekteptiń ákimshilik bóligi, mundaǵy birinshi qabatta mektep basshylyǵy ornalasady. Besinshi blok – bastaýysh synyptar men mektepke deıingi balalarǵa arnalǵan, olar ekinshi jáne úshinshi qabatta ornalasqan. Qalǵan bloktar orta jáne joǵary synyptarǵa arnalǵan. Mektep aýlasynda bastaýysh synyptarǵa arnalǵan alańdar men joǵary synyp oqýshylarynyń áskerı daıyndyǵyna arnalǵan alań, fýtbol men voleıbol alańdary da ashylǵan», – dep qosty Erbol Turaıysov.
Jańa mektep qazirgi zamanǵy jaılylyq pen qaýipsizdik talaptaryna tolyq saı keledi. Ǵımaratta tórt sport zaly, STEM-zerthanalar, robototehnıka aımaqtary, kitaphana, kovorkıngter, sondaı-aq ınklúzıvti ortaǵa arnalǵan lıftiler men pandýstar da bar. Ár qabatta aýyzsý ornatylyp, oqýshylarǵa oqýlyǵyn saqtaıtyn jeke shkaf berilgen. Qaýipsizdikti qamtamasyz etý maqsatynda mektep beınebaqylaý júıesimen, dabylmen jabdyqtalǵan.
Qazaqstan Respýblıkasy Prezıdentiniń tapsyrmasyna sáıkes, bul mektep kóp aýysymdy oqytýdy joıyp, tozǵan mektepterden bas tartý úshin salynyp jatqan nysan. Bul jaı ǵana jańa mektep emes, bul bilim berý ınfraqurylymyn jaqsartýǵa baǵyttalǵan sapaly qadam, barlyq oqýshyǵa teń ári jaıly jaǵdaı jasaýǵa umtylý.