Konferensıaǵa Ázirbaıjan, Túrkıa jáne Qazaqstannyń arheolog ǵalymdary qatysty
Qazaqstan Respýblıkasy Táýelsizdiginiń 30 jyldyǵyna oraı «Tańbaly» memlekettik tarıhı – mádenı jáne tabıǵı qoryq mýzeıiniń sapar ortalyǵynda «Qazaqstannyń tarıhı-mádenı murasy: zerdeleý, túsindirý jáne saqtaý máseleleri» atty halyqaralyq ǵylymı – tájirıbelik konferensıasy ótti, dep habarlaıdy Almaty-akshamy.kz.
Konferensıaǵa Ázirbaıjan, Túrkıa jáne Qazaqstannyń belgili arheolog ǵalymdary qatysyp, jartas ónerin saqtaý men konservasıalaý taqyrybyndaǵy qundy pikirlerin ortaǵa saldy.
Jıynda Qazaqstan Respýblıkasynyń Eńbek sińirgen qaıratkeri, jalpy ulttyq táýelsiz «Platınaly Tarlan» syılyǵynyń ıegeri, German arheologıa ınstıtýtynyń korespondent múshesi Zeınolla Samashev, tarıh ǵylymdarynyń doktory, profesor, belgili arheolog J.Taımaǵanbetov, Qazaqstan Respýblıkasynyń Eńbek sińirgen qaıratkeri, Qazaqstan Respýblıkasy Sýretshiler odaǵynyń múshesi, sýretshi-qalpyna keltirýshi, «Ostrov-Krym» ǵylymı –zertteý zerthanasynyń basshysy Qyrymbek Altynbekov, Ankara qalasyndaǵy Qajy Baıram Velı ýnıversıteti, arheologıa bóliminiń Rhd dosenti Atakan Akchaı, atalǵan ýnıversıtettiń túrki fólklory bóliminiń Rhd dosenti Evrım Olcher, Gobýstan memlekettik tarıhı - kórkem qoryq murajaıynyń dırektory Výgar Isaev, Ál-Farabı atyndaǵy Qazaq Ulttyq Ýnıversıtetiniń tarıh, arheologıa jáne etnologıa fakúltetiniń dekany, tarıh ǵylymdarynyń kandıdaty, dosent M.Noǵaıbaeva jáne Ál-Farabı atyndaǵy Qazaq Ulttyq Ýnıversıtetiniń tarıh, arheologıa jáne etnologıa fakúltetiniń profesory, tarıh ǵylymdarynyń doktory M.Eleýov syndy tanymal ǵalymdar baıandama jasady.
Konferensıa barysynda Gobýstan memlekettik tarıhı - kórkem qoryq murajaıy men «Tańbaly» memlekettik tarıhı- mádenı jáne tabıǵı qoryq- mýzeıi arasyndaǵy yntymaqtastyq qarym- qatynas pen tájirıbe almasý maqsatynda eki jaqty memorandýmǵa qol qoıyldy.
«Tańbaly» memlekettik tarıhı- mádenı jáne tabıǵı qoryq-mýzeıiniń dırektory Madıar Ámirǵalıev kelgen qonaqtardy Tańbaly shatqalyna bastap baryp, jartasyndaǵy sýretterdi kórsetti. Shetelden kelgen qonaqtar «Tańbalynyń» tylsym sýretterin tamashalap, munda atqarylyp jatqan jumystarǵa joǵary baǵa berdi.