Almaty oblysynda mesenattar halyqtyń áleýmettik áljýaz toptaryna páter satyp áperdi
Almaty oblysynda az qamtylǵandar qataryndaǵy 12 taldyqorǵandyq otbasy mesenattardyń kómegimen baspanaly boldy. Olardyń ishinde kóp balaly analar, jalǵyzbasty analar, erekshe balalardy tárbıelep otyrǵandar, jetim balalar, tolyq emes otbasylar, múmkindigi shekteýli azamattar bar , - dep habarlaıdy Almaty-akshamy.kz Almaty oblysy ákiminiń baspasóz qyzmetine silteme jasap.
Kezekte turǵandarǵa bul páterlerdi mesenat Erik Aıdarbaev pen «Hareket» respýblıkalyq qaıyrymdylyq qory satyp berdi. Analarǵa berilgen páter kiltteri men sertıfıkattar 8 Naýryz merekesi qarsańyndaǵy erekshe syı boldy.
«Búgingi kúni álemde áıelder eńbek etip, qoǵamnyń barlyq salasynda tabysty qyzmet jasaýda, úıde de, túzde de óz mindetterin jaýapkershilikpen atqaryp júr. Ásirese kóp balaly analarǵa zor alǵys aıtamyz. Óıtkeni balalar - kez kelgen eldiń basty baılyǵy. Sondyqtan kóp balaly, az qamtylǵan otbasylaryn qoldaý – ortaq azamattyq paryzymyz», - dedi 9 páterdiń kiltin tapsyrý saltanatynda mesenat E.Aıdarbaev.
«Hareket» qaıyrymdylyq qorynyń Taldyqorǵandaǵy jetekshisi Amangeldi Tólemisov merekege jınalǵan áıelderdi quttyqtap, qorǵa qoldaý kórsetken demeýshilerge rızashylyǵyn bildirdi.
«Qaıyrymdylyq qory jumysyn bastaǵan jyldardan beri baspanaǵa muqtaj jandarǵa 593 páterdiń kilti berildi. Sonyń ishinde Taldyqorǵan óńirinde bárimiz jumyla otyryp 48 otbasyǵa baspana áperdik. Sol sıaqty respýblıka boıynsha «70 baspana» aksıasy naýryz aıynda bir aı boıy jalǵasyp, 30 kún ishinde 70 páter áperý josparlanǵan. Sonyń 5-eýi Taldyqorǵan qalasynda beriledi, sonyń 3-eýi búgin berilip otyr. Qoldaýǵa muqtaj jandar áli de az emes, sondyqtan qol ushyn soza alatyn jandardy qatarymyzǵa shaqyramyz», - dedi A.Tólemisov.
Mesenattarǵa rahmetin aıtqan Qanat Bozymbaev oblysta kóp balaly jáne az qamtylǵan otbasylardyń ál-aýqatyn arttyrýǵa baǵyttalǵan áleýmettik qoldaý sharalary júıeli atqarylatyn atap ótti. Bul rette turǵyn úımen qamtýǵa erekshe nazar aýdarylyp, máseleni sheshýge kásipkerler belsendi kómek kórsetip kele jatyr.
«Bıyl bizdiń oblysta mesenattardyń qoldaýymen kóp qabatty 15 turǵyn úı salyna bastaıdy. Jalpy oblys kóleminde qurylys aýqymyn ulǵaıtýymyz kerek. Óıtkeni bizde 60 myńnan astam jetisýlyq úı kezeginde tur. Qazirgi kezde qarjylandyrýdyń ártúrli kózderi esebinen jyl saıyn 3 myń páterdi paıdalanýǵa berip kelemiz. Osy kórsetkishti kem degende jylyna 10 myń páterge jetkizýimiz qajet. Olaı bolmasa turǵyndar óz kezegin 20 jyldap, tipti odan da kóp kútýi múmkin. Bul máselede bizge mesenattar men kásipkerlerdiń kómegi kerek. Memleket basshysy Qasym-Jomart Toqaev aıtqandaı, bıznes aıaǵynan nyq turdy, endi memleket pen onyń azamattaryna áleýmettik ózekti máselelerdi sheshýge kómektesetin ýaqyt keldi. Osyndaı úlken júrekti azamattardyń arqasynda taldyqorǵandyq 12 otbasy búgin úıli bolyp otyr. Bul - kópshilikke úlgi bolarlyq is», - dedi Q. Bozymbaev.
Bes balanyń anasy Álıa Kaýmenova qonystoı ıeleriniń atynan mesenattarǵa alǵysyn bildirdi.
«Biz kóp jyldan beri páter jaldap kelemiz. Balalarmen anda-mynda kóship júrgen qıyn. Endi bizdiń óz baspanamyz bar. Qatty qýanyp turmyn, meniń armanymdy oryndaǵan, otbasymdy qıyndyqtan alyp shyqqan azamattarǵa shyn júrekten rahmet aıtamyn» , - dedi kóp balaly ana.
Almaty oblysy halyqtyń tabıǵı ósimi jaǵynan respýblıkada aldyńǵy orynda, bal týý kórsetkishi joǵary. 2019 jyly 50 myń bala ómirge kelse, 2020 jyly 54 myń, ótken jyly 56 myń bala dúnıe esigin ashqan. Búgingi kúni óńirde 59 myńnan astam kóp balaly otbasy bar. Sonyń ishinde 28 myń ana – «Altyn alqa», «Kúmis alqa» tósbelgileriniń ıegeri.