Qazaq qyzdary Birinshi dúnıejúzilik soǵys kezinde erliktiń eren úlgisin kórsetken
Atalǵan ekspozısıa Halyqaralyq áıelder kúnine oraı uıymdastyrylý ústinde. Onyń negizgi maqsaty – surapyl soǵys jyldarynda erlik kórsetken qazaqstandyq arýlar týraly syr shertý, dep habarlaıdy Almaty-akshamy.kz Qorǵanys mınıstrliginiń baspasóz qyzmetine silteme jasap.
Qazaq dalasy erlermen qatar týǵan jerdi qasyq qany qalǵansha qorǵap, batyrlyq tanytqan názik jandylarǵa kende emes.
Qazaq qyzdary Birinshi dúnıejúzilik soǵys kezinde erliktiń eren úlgisin kórsetken. Máselen, Aqqaǵaz Dosjanova meıirbıke retinde maıdanǵa jiberildi, jaralanǵandarǵa kómek kórsetti, gospıtáldarda jumys istedi.
Azamat soǵysy jyldary aǵartýshy Alma Orazbaeva qazaq jaýyngerlerinen quralǵan eskadronnyń komısary bolǵan.
Uly Otan soǵysynda maıdan dalasynda mergen Álıa Moldaǵulova, pýlemetshi Mánshúk Mámetova, ushqysh Hıýaz Dospanova jaýmen shaıqasyp, jeńisti jaqyndatty.
Kúmis kómeı ánshi Roza Baǵlanova bulbul daýsymen maıdandaǵy, aýrýhanalardaǵy jáne tyldaǵy jaýyngerlerdi rýhtandyrdy. Qazaq opera óneriniń negizin qalaýshylardyń biri – Kúlásh Baıseıitova konserttik toptyń quramynda birneshe ret maıdanda óner kórsetken.
Kórmedegi jádigerler soǵystar men qarýly qaqtyǵystarǵa qatysqan basqa da kóptegen qazaq áıelderine arnalǵan.
Kórmege kelýshiler úshin Qorǵanys mınıstrligi Ortalyq ansambliniń jáne áskerı orkestrdiń oryndaýynda soǵys jyldaryndaǵy ánder men áýender shyrqalý ústinde.