Rahat Álıevtiń týysqanyna tıesili qus fabrıkasy memleket menshigine qaıtaryldy. Mundaı sheshimdi Almaty oblysy, Talǵar aýdanynyń soty jergilikti prokýratýra talap-aryzy boıynsha shyǵardy, dep habarlaıdy Almaty-akshamy.kz Tengrinews.kz-ke silteme jasap.
Áńgime Lıvan týmasy Issam Salah Horanı týraly bolyp otyr, 1998-2008 jyldar aralyǵynda onda Qazaqstan tólqujaty bolǵan, qazir Palestına azamaty. Ol - American Investments inc. amerıkandyq korporasıasynyń prezıdenti, sonymen qatar Rahat Álıevtiń qaryndasy Gúlshat Horanıdiń kúıeýi. 2008 jyldan beri Horanı Shveısarıa men Lıvanda, sondaı-aq bopsalaý boıynsha Qazaqstanda jasaǵan qylmystary úshin Interpol arqyly izdeýde bolǵan.
1999 jyly aksıalardyń memlekettik paketi (90 paıyz) amerıkandyq American Investments Inc. korporasıasyna syıǵa tartylǵan.
«1999 jylǵy naýryzda Talǵar aýdanynyń ákimdigi «Aq-qanat» AQ-nyń paıdalanýyndaǵy jerdi amerıkandyq korporasıa paıdasyna - jalpy aýdany 665,4 gektar 4 jer ýchaskesin - bes jylǵa shyǵarý týraly sheshim shyǵardy. Sol jyldyń qazanynda alynǵan 665,4 gektar jerdiń 56 gektary "Altyn-Aıdar" JSHS-ne berildi», - delingen qujatta.
Al 2001 jyly Talǵar aýdanynyń ákimdigi American Investments Inc. kompanıasynan «Altyn-Aıdar» JSHS paıdasyna 609 gektar jerdi paıdalanýdan shyǵarǵan. Bul jerler 6 jer telimine bólinip, 2002 jyly Talǵar aýdany ákimdigi men «Altyn-Aıdar» JSHS arasynda 49 jylǵa tıisti jalǵa berý sharttary jasalǵan.
«Muraǵat málimetterine sáıkes, Almaty aýmaqtyq memlekettik múlik jáne jekeshelendirý komıteti men American Investments inc. amerıkalyq korporasıasy arasynda qus fabrıkasyn óteýsiz berý týraly shart jasalmady, óndiristi damytýǵa jáne kredıtorlyq bereshekti óteýge ınvestısıalar engizýdiń bıznes-jospary ázirlenbedi jáne ýákiletti organǵa berilmedi. Qus fabrıkasy 29 jyl boıy jumys istemeıdi, onyń resýrstary óte qıyn jaǵdaıda, aýylsharýashylyq tehnıkasy men kólik quraldary eskirgen, qurylystarǵa aǵymdaǵy jáne kúrdeli jóndeý júrgizilmegen, ınvestısıalar salynbaǵan, salyq bereshegi bar.
Qus fabrıkasynyń múlkin ıelikten shyǵarý deregi ýaqtyly anyqtalǵan kezde Almaty memlekettik múlik jáne jekeshelendirý aýmaqtyq komıteti memlekettik múlikti memleketke qaıtarý jóninde sharalar qabyldaýǵa mindetti boldy, alaıda bul oryndalmady, osyǵan baılanysty prokýror memleket múddesi úshin talap qoıdy», - dedi prokýrorlar sotta.
Sot is materıaldaryn zerdelep, aýdan prokýratýrasynyń talap aryzyn qanaǵattandyrdy. Sóıtip, qus fabrıkasy men onyń jerleri memleket menshigine qaıtaryldy.