Bıyl sý únemdeý tehnologıalary bar egis alqaptary 300 myń gektarǵa deıin jetkiziledi. Bul týraly Májiliste ótip jatqan Úkimet saǵatynda Aýyl sharýashylyǵy mınıstri Erbol Qarashókeev aıtty, dep habarlaıdy Almaty-akshamy.kz.
«Kókóniske qatysty jalpy ónimin arttyrýdyń negizgi faktorlarynyń biri - sýarmaly jerlerdi aınalymǵa engizý. Bul jumys Ekologıa, geologıa jáne tabıǵı resýrstar mınıstrligimen birlesip júrgiziledi. Qazirgi kezde sý únemdeý tehnologıalary engizilgen aýdandar kóbeıip keledi. Bul óz kezeginde sý men qorektik zattardy naqty berý arqyly ónimdilikti arttyrýǵa yqpal etedi. Jyl saıynǵy ósimge ınvestısıalyq sýbsıdıalaý yqpal etip otyr, onyń aıasynda fermerlerdiń qazirgi zamanǵy sýarý júıelerin satyp alýǵa, sondaı-aq sý alý jáne berý úshin barlyq qajet ınfraqurylymdy júrgizýge jumsaǵan shyǵyndarynyń 50 paıyzy ótelip jatyr», - dedi E. Qarashókeev.
Onyń aıtýynsha, 2022 jyly sý únemdeý tehnologıalary qoldanylatyn jerler 21 myń gektarǵa ósti, dep jazdy Qazaqparat.
«Bıyl sý únemdeý tehnologıalary bar mundaı jerlerdiń aýmaǵyn 300 myń gektarǵa deıin jetkizý eskerilgen, al 2030 jylǵa qaraı sýarmaly alqaptar 750 myń gektarǵa deıin jetkiziledi», - dedi mınıstr.