«Atyraý-Kýtaısı» baǵytyndaǵy halyqaralyq áýe reısine ótý barysynda Grýzıa azamatynan 100 myń AQSH dollary mólsherinde qolma-qol aqsha anyqtalǵan.
Onyń qol júginde 10 myń AQSH dollary, jol júginde 90 myń AQSH dollary mólsherinde jasyrylǵan qarajat bolǵan. Jasyrylǵan aqsha zań buzýshynyń jol júginde Atyraý oblystyq «Áýejaı-Atyraý» keden beketiniń qyzmetkerlerimen kedendik baqylaý júrgizý barysynda anyqtaldy, dep habarlaıdy almaty-akshamy.kz.
Baqylaý sharalary Atyraý oblysy boıynsha Shekara qyzmeti jáne Ekonomıkalyq tergep-tekserý departamentteriniń qyzmetkerlerimen birlesip júrgizilgen. Zań buzýshy ákimshilik jaýapkershilikke tartylǵan. Kúshine engen sot sheshimine sáıkes, 90 myń AQSH dollary memleket paıdasyna tárkilendi, qalǵan 10 myń AQSH dollary Grýzıa azamatyna qaıtaryldy. Sondaı-aq, odan 40 AEK mólsherinde ákimshilik aıyppul óndirilgen.
Eger EAEO kedendik aýmaǵyna bir ýaqytta ákelý nemese EAEO kedendik aýmaǵynan bir ýaqytta áketý kezinde mundaı qolma-qol aqsha qarajatynyń nemese jol chekteriniń jalpy somasy keden organyna jolaýshylarǵa arnalǵan kedendik deklarasıany usynǵan kúnge qoldanysta bolatyn valúta baǵamy boıynsha on myń AQSH dollaryna balamaly somadan asyp ketse, qolma-qol aqsha qarajaty jáne (nemese) jol chekteri kedendik deklarasıalaýǵa jatady.
QR Prezıdentiniń 2022 jylǵy 14 naýryzdaǵy №830 "Qazaqstan Respýblıkasynyń qarjylyq turaqtylyǵyn qamtamasyz etý jónindegi sharalar týraly" Jarlyǵyna sáıkes 10 myń AQSH dollarynan asatyn somada qolma-qol shetel valútasyn áketýge tyıym salynǵanyn eske salamyz.