Tanysyp qoıyńyzdar, bul – Aıdarbaı Káýsar Qabylbekqyzy. 8 jasta. Almaty qalasynda dúnıege kelgen. Almaly aýdanynda ornalasqan №147 gımnazıanyń 3 «g» synyp oqýshysy. Biz ony eń alǵash A.Chehov atyndaǵy qalalyq kitaphanada ótken mádenı-rýhanı keshte kórgenbiz. Naqyshyna keltire óleń oqyǵan. Kózinde oty bar erekshe búldirshinmen jaqynyraq tanysqymyz keldi.
Sóıtsek, kishkentaı Káýsar án de salady, myń burala bıleıdi, óleń de shyǵarady, sýret salady, ermeksazben ań, qustardy, oıyna kele qalatyn buıymdardy jasaıdy. Qýyrshaqtaryna túrli kóılek, keýdeshe, beldemsheler tigedi. Qolónermen de aınalysady. Máselen, názik saýsaqtarymen túrli-tústi bıserlerdi ilip alyp, ádemi monshaqtar, bilezikter jasaıdy.
Kitapty kóp oqıdy. Oǵan anasynyń kitaphanada jumys isteıtini de áser etken bolar, bálkim. Ol kishkentaı bolsa da, kitap sórelerinen anasynyń kómeginsiz óziniń jasyna saı kitaptar tańdaı biledi. Óziniń súıikti keıipkerleri de bar.
– Men qyzymdy kishkentaı kúninen ózimmen birge kitaphanaǵa jıi ákelemin. Talaı aqyn-jazýshylardyń keshinde eń kishkentaı oqyrman, kórermen bolyp otyrdy. Sodan da bolar, shyǵarmashylyqqa jaqyn. Keıde sózderine, is-qımylyna qarap otyrsam, óz jasynan erte eseıip ketkendeı kórinetini bar. Jaqynyraq sóılesken adamdar da sózderi túıeden túskendeı, túıdek-túıdek dep jatady. Áńgimeleskendi jaqsy kóredi. Jaıyqtyń aq shaǵalasy atanǵan aqyn apamyz Aqushtap Baqtygereeva aýzyna túkirip, batasyn berip edi, qasıeti qonǵan bolar dep oılaımyn keı-keıde, – deıdi kitaphanashy anasy Aınur Balaýbaeva.
Balabaqshada júrgen kezinen-aq taqpaqtardy tez jattap alatyn qaǵylez bala boldy. Oqýlyqtardaǵy mátinderdi de bir oqyǵannan qaǵyp alady. Sol balabaqshada júrgen kezinde Júrsin Ermannyń 70 jyldyq mereıtoıyna arnalǵan baıqaýǵa qatysyp, yntalandyrý syılyǵyna ıe bolǵany bar. Al mektep tabaldyryǵyn attaǵan kezde anasy oǵan Abaı Qunanbaevtyń, Ybyraı Altynsarınniń óleńderin oqyta bastady. Al qazir belgili aqyn Serik Qalıev syılaǵan «Balalar antologıasy» degen kitappen dos bolyp júrmiz. Almat Isádil, Saıat Qamshyger aǵalarynyń óleńderin de jatqa oqıdy. Aıtysker aqyndar Shuǵaıyp Sezimhan men Qaziret Berdihan da Káýsardyń tilekshi aǵalary.
Kúndelikti ómirde tıanaqty. Jaýapkershilik – basty qaǵıdasy. Meıirimdi, kópshil. Qolynda baryn únemi bólisip júredi. Jazdy jaqsy kóredi. Anasymen, dostarymen saıabaqtarǵa, teatrǵa, kınoteatrǵa jıi barady. «Dostar bir-birine adal, qamqor bolý kerek. Qınalǵanda kómektesip, qýanǵanda birge qýaný kerek. Sonda naǵyz dos bolǵanyń» deıdi kishkentaı Káýsar úlken oı aıtyp. Al anasy – bul ǵalamdaǵy eń úlken, eń ǵajap dosy! «Men úshin anamnan artyq adam joq!» degen bir aýyz sózinen kóp mahabbatty sezindik.
Káýsardyń armany kóp eken. Bárin saýsaǵyn búgip turyp tizip shyqty. Óskende jer sharyn aralaǵysy keledi. Árıne, anasyn ertip alady. Óziniń egizi nemese sińlisi, inisi, jalpy úıde kóp adam bolǵanyn qalaıdy. Bolashaqta anasyn, ata-apasyn jáne búkil qazaq halqyn emdeıtin dáriger bolǵysy keledi. Ol úshin kóp oqý kerek ekenin de ózi aıtty. Úlken úıimiz bolsa dep armandaıdy. Laıym, barlyq armanyna jetsin Káýsar! San qyrly búldirshinge kóz tımesin! Osyndaı baldyrǵandar – eldiń bolashaǵy.