Almaty ákimdigi qalada qalyptasqan sportpen aınalysý trendin qoldaýǵa, almatylyqtardyń salaýatty ómir saltynyń jańa ıdeologıasyna jáne megapolıstiń mádenı kodynyń bir bóligine aınaldyrý arqyly sporttyq ınfraqurylymdy jańǵyrtýǵa jáne keńeıtýge nıetti, dep habarlaıdy Almaty-akshamy.kz.
"Almaty qalasyn 2025 jylǵa deıin damytý jáne 2030 jylǵa deıingi orta merzimdi perspektıvalar" baǵdarlamasynda atap ótilgendeı, qala bıliginiń kúsh-jigeri halyqaralyq talaptarǵa jaýap beretin kóshe jáne sport ınfraqurylymyn jańǵyrtýǵa, buqaralyq jáne áýesqoı sportty qoldaýǵa jáne qalada halyqaralyq sport jarystary men sporttyq-buqaralyq sharalardy ótkizýge baǵyttalatyn bolady.
2025 jylǵa deıin búdjet esebinen erekshe qajettilikteri bar adamdarǵa beıimdelgen ınfraqurylymy bar 11 dene shynyqtyrý-saýyqtyrý keshenin (DSHSK) jáne jeke ınvestısıalar esebinen keminde 5 DSHSK salý josparlanýda. Budan ári 2030 jylǵa deıin qalada búdjet qarajaty esebinen qalanyń ártúrli aýdandarynyń turǵyndaryn ámbebap sport ınfraqurylymymen tolyq qamtý úshin jylyna keminde 3 DSHSK salynatyn bolady.
Jabyq sport obektileriniń sanyn ulǵaıtý 2025 jylǵa deıin sport alańdarynyń tapshylyǵyn 70 myń sharshy metrge qysqartady. Osylaısha, halyqty sporttyq-rekreasıalyq ınfraqurylymmen qamtamasyz etý kórsetkishi 75%-ǵa jetedi. 2030 jylǵa qaraı tapshylyq 100 myń sharshy metrge qysqarady, al halyqtyń sporttyq ınfraqurylymmen qamtamasyz etilýi 80%-dy quraıdy. Qalada belsendi ýaqyt ótkizý, dene shynyqtyrý jáne sportpen shuǵyldaný, densaýlyqty nyǵaıtý úshin keń múmkindikter paıda bolady. Munyń bárine, onyń ishinde memlekettik-jekeshelik áriptestik úlesin ulǵaıtý, sondaı-aq jeke ınvestısıalardy tartý esebinen qol jetkiziletin bolady.
Qala kóshe jáne ekstremaldy sport túrleriniń sporttyq qaýymdastyqtarynyń damýyna qoldaý kórsetedi. Ol úshin qalanyń saıabaq aımaqtarynda arnaıy berik jabynmen júgirýge arnalǵan 30 shaqyrym jol, qala boıynsha 125 shaqyrym qosymsha velojol, mobıldi skalodrom jáne skeıt-park, strıtbolǵa arnalǵan 16 alań, kóshe vorkaýty jáne Orep Air fıtnes, sondaı-aq BMX-trassanyń qurylysy josparlanǵan.
Almatynyń sporttyq qala retindegi ımıjin qalyptastyrý jáne ilgeriletý jáne ony halyqaralyq sporttyq kúntizbelerde senimdi bekitý úshin jyl saıyn halyqaralyq deńgeıdegi keminde 35 iri sporttyq jáne sporttyq-buqaralyq is-sharalar ótkizý josparlanýda. 2030 jylǵa qaraı mundaı oqıǵalardyń sany jylyna 40-qa deıin artady.
Salaýatty ómir salty jáne sportpen shuǵyldaný qalalyq áleýmettik mádenıettiń mańyzdy elementi bolady dep kútilýde. Al sporttyq-buqaralyq is-sharalar men halyqaralyq sporttyq is-sharalarǵa qatysý qala turǵyndarynyń belsendi demalysyna aınalady jáne "sport-týrısterdiń" qosymsha legin tartady. Halyqty (onyń ishinde erekshe qajettilikteri bar adamdardy) dene shynyqtyrýmen jáne sportpen júıeli túrde aınalysýǵa tartý deńgeıi 2025 jylǵa qaraı 40%-ǵa jáne 2030 jylǵa qaraı 50%-ǵa deıin ósedi. Bul rette 2025 jylǵa deıin balalar men jastardyń 35%-yn, al 2030 jylǵa deıin 50%-yn dene shynyqtyrýmen jáne sportpen turaqty shuǵyldanýmen qamtý josparlanyp otyr.