Bul naýqan qazan aıynyń basynda aıaqtalady.
Qazan aıynyń basynda qazaqstandyq sharýalar astyq jınaý naýqanyn aıaqtaıdy, bul týraly Aýyl sharýashylyǵy mınıstrliginiń mamandary aıtty, dep habarlaıdy Almaty-akshamy.kz.
«17 qyrkúıektegi jaǵdaı boıynsha, 14,1 mln gektar egis alqabyndaǵy dándi jáne dándi-burshaqty daqyl jınaldy. Ortasha ónimdilik gektaryna 9,2 sentnerden aınaldy. Bul 2020 jylǵy deńgeıden 22,8%-ǵa tómen (ótken jyldyń sáıkes kezeńinde ortasha ónimdilik gektaryna 11,9 sentnerden aınaldy). Dál búgingi kúnge deıin jalpy 13 mln tonna astyq jınaldy, onyń 10,4 mln tonnasy bıdaı», – delingen Aýyl sharýashylyǵy mınıstrliginiń baspasóz qyzmetiniń habarlamasynda.
Bıdaıdan ózge mamandar 197,8 myń tonna maıly daqyl, 2 142,7 myń tonna kartop, 3 730,1 myń tonna kókónis daqyldary, 2 581,3 myń tonna baqsha daqyldaryn jınap alǵan.
Egin egetin negizgi úsh óńir – Aqmola, Qostanaı jáne Soltústik Qazaqstan oblystarynda 10,6 mln gektar egis alqaby jınalǵan.Bul jalpy alańnyń 91,4%-y. Ortasha ónimdilik gektaryna 8,4 sentnerdi qurap, 8,9 mln tonna ónim jınalǵan.
«Astyqtyń jalpy túsimi 15,3 mln tonnaǵa jetedi degen boljam bar. Sonyń ishinde bıdaıdyń túsimi 10,5 mln tonnaǵa jýyqtaýy múmkin. QR Ulttyq statısıka búrosynyń derekterine sáıkes, 2021 jyldyń 1 tamyzyndaǵy jaǵdaı boıynsha respýblıkada dándi jáne dándi-burshaqty daqyldar 3,5 mln tonna, onyń ishinde bıdaı 2,8 mln tonna bolǵan. Ótken jyldan qalǵan astyqty eseptegende shamamen 18,8 mln tonna astyq bar. Onyń 13,3 mln tonnasy bıdaı», – dep habarlaıdy mamandar.
Resmı málimet boıynsha, egin jınaý jumystaryn ýaqytyly atqarý úshin fermerlerge 396,5 myń tonna jeńildetilgen dızel otyny bólindi. 2021 jyldyń 16 qyrkúıegindegi jaǵdaı boıynsha 247,5 myń tonna (62%) jetkizildi. Munaı óńdeý zaýytyndaǵy otynnyń lıtri 156 teńge (tonnasy 189,0 myń teńge), operatorlardyń jetkizý qyzmetiniń qunyn qosa eseptegende de dızel otynynyń óńirlerdegi ortasha baǵasy qymbat emes. Sharýalar dızel otynynyń bir lıtrin 177 teńgeden alady.
Respýblıkada syıymdylyǵy 28,8 mln tonna astyq saqtaıtyn múmkindik bar. Onyń ishinde astyq qabyldaý kásiporyndarynda 12 mln tonna, fermerlerde 16,8 mln tonna astyq saqtaıtyn oryn bar.
Bıylǵy egin jınaý naýqany shtattyq rejımde jáne josparlanǵan kestege sáıkes júrip jatyr. Jumysty ýaqytynda atqarýǵa qatysty barlyq máseleler Aýyl sharýashylyǵy mınıstrliginiń turaqty baqylaýynda. Tıisti monıtorıń pen taldaý jasalyp otyrady.