Mádenıet jáne sport mınıstri Aqtoty Raıymqulova Serbıa astanasy Belgradta ótken bokstan erler arasyndaǵy XXI álem chempıonatynyń jeńimpazdaryn, júldegerlerin jáne Qazaqstan quramasynyń bapkerlerin qabyldady dep habarlaıdy almaty-akshamy.kz Sport jáne dene shynyqtyrý isteri komıtetiniń baspasóz qyzmetine silteme jasap.
Mınıstr óz sózinde Serbıadaǵy chempıonatta Qazaqstan quramasy qol jetkizgen birneshe eleýli oqıǵany atap ótti.
Qazaqstan egemen el retinde 1993 jyldan beri bokstan álem chempıonattaryna úzdiksiz qatysyp keledi. Osy aralyqtaǵy 15 álem chempıonatynda bizdiń bylǵary qolǵap sheberleri 51 medaldi qorjynǵa saldy. Onyń 14-i altyn, 15-i kúmis, 22-si qola. Osy básekede biz barlyq júlde sany boıynsha AQSH-tan ozyp, jalpy esepte Kýba men Reseıden keıin úshinshi orynǵa kóterilip otyrmyz. Bul bizdiń bokstan álemdegi jetekshi memlekettiń biri ekenimizdi kórsetedi. Aldaǵy ýaqytta da tynymsyz eńbektiń arqasynda sportshylarymyz osy qarqynymen júlde qoryn molaıta beredi dep senemin. Sizder úshin kelesi mejeniń biri – Tashkentte ótetin álem chempıonaty bolmaq, – dedi mınıstr.
Sonymen qatar Aqtoty Raıymqulova barlyq boksshymyz sharshy alańda baryn salyp judyryqtasqanyn, jarqyn jekpe-jekterimen qalyń jankúıerdiń joǵary baǵasyn alǵanyn jetkizdi.
Sizder osy dúbirli dodada joǵary sheberlikterińizdi pash ettińizder. Ár jekpe-jekte jeńiske degen zor qushtarlyq tanyttyńyzdar. Muny Sizderge qyzý qoldaý kórsetken jankúıerler sezedi. Árbir úlken jeńistiń artynda sportshynyń tabandylyǵymen qatar bapkerdiń qajyrly eńbegi turady. Osy tusta bizdiń bapkerler qosynyna erekshe alǵys aıtqym keledi. Laıym shákirtterińiz senim údesinen shyǵyp, úmitterińizdi aqtasyn, – dep aıtty mınıstr.
Kezdesý barysynda Ulttyq quramanyń kapıtany Abylaıhan Júsipov sóz alyp, chempıonatqa tyńǵylyqty daıyndalý úshin jaǵdaı jasaǵany úshin mınıstrlikke, federasıaǵa qurama atynan raqmet aıtty.
Osydan keıin Mádenıet jáne sport mınıstri álem chempıonatynyń jeńimpazdary men júldegerlerine sporttyq ataqtardy, razrádtardy jáne biliktilik sanattaryn berý normalary men talaptaryna sáıkes, Qazaqstannyń eńbek sińirgen jattyqtyrýshysy jáne eńbek sińirgen sportshysy ataǵyn oryndaǵan bapkerler men boksshylardy marapattady.
Eki jylda bir ótetin bokstan álem chempıonaty 26 qazan men 6 qarasha aralyǵynda Belgrad qalasynda ótken bolatyn. Bul chempıonatqa álemniń 105 memleketinen 650 sportshy qatysty. Qazaqstan quramasy sapynan 13 sportshy attanyp, qurama 2 altyn, 2 kúmis, 1 qola medal jeńip aldy. Osylaısha, jalpy komandalyq esepte ekinshi orynǵa turaqtady.