Qytaıdyń ulttyq meteorologıalyq ortalyǵy beısenbi kúni eldiń kóptegen aımaǵynda kúnniń qatty ysýyna baılanysty bıyldyqqa alǵash ret «qyzǵylt sary» eskertýin jarıalady, bul – ekinshi oryndaǵy joǵary qaýip deńgeıi, dep habarlaıdy Almaty-akshamy.kz QazAqparat agenttigine silteme jasap.
Eldiń meteorologıalyq ortalyǵy 23 maýsymda kúndiz Soltústik Qytaı jáne Hýanhe men Hýaıhe ózeni boıyndaǵy aımaqtarda aýa temperatýrasy 35 gradýstan joǵary bolatynyn habarlady.
Boljam boıynsha, Hebeı men Shandýn provınsıalarynyń keı jerlerinde jáne Beıjiń men Tánszın qalalarynda temperatýra 40 gradýsqa jetýi múmkin.
Keshe saǵat 9:00-de Beıjińde aýa temperatýrasynyń joǵary bolýyna baılanysty «qyzǵylt sary» eskertýi jarıalandy. Boljam boıynsha Qytaı astanasynyń kóptegen aýdandarynda aptap ystyq senbige deıin saqtalady.
Aıta ketsek, saǵat 8:00 men 16:00 aralyǵynda Hebeı men Shandýn, Beıjiń jáne Tánszın provınsıalarynyń bir bóliginde aýa temperatýrasy 40 gradýstan asqan. Osy tórt provınsıa aımaǵynda ornalasqan 17 memlekettik meteorologıalyq stansıa aýanyń rekordtyq joǵary temperatýrasyn tirkedi. Beıjiń meteorologıalyq qyzmetiniń habarlaýynsha, qalanyń ońtústigindegi Nanszáo meteorologıalyq stansasynda saǵat 15:19-da aýa temperatýrasy 41,1 gradýs bolǵan.
Qytaıda joǵary temperatýraǵa baılanysty úsh deńgeıli eskertý júıesi qabyldanǵan: qaýiptiliktiń eń joǵary deńgeıi – qyzyl tús, odan keıin qyzǵylt sary jáne sary tús.