Bul rette polısıa, quqyq buzýshylyq jasaǵany úshin shamamen 3 myń 500 adam ákimshilik jaýapkershilikke tartylǵan.
Shaharda qoǵamdyq tártipti saqtaýǵa, kóshede jáne basqa da qoǵamdyq oryndarda qylmystardyń aldyn alýǵa jáne jolyn kesýge baǵyttalǵan «Quqyqtyq tártip» jalpyrespýblıkalyq jedel aldyn alý is-sharasy ótýde, dep habarlaıdy Almaty-akshamy.kz Almaty qalalyq polısıa departamenti baspasóz qyzmetine silteme jasap.
«Bul kúnderi Almatydaǵy polısıa qyzmeti men bólimsheleriniń jeke quramy kúsheıtilgen qyzmet rejımine aýystyryldy. Ár aýdannyń polısıa Basqarmalarynda aýysymmen kúrdeli jáne keshendi kúshterdiń birkelki saptúzeýi júzege asyrylady, onda komandırler olarǵa ýchaskeniń qazirgi qylmystyq jaǵdaıy týraly habarlaýy, ashylmaǵan qylmystarǵa baǵyt-baǵdar berýi, sonymen qatar, olardyń ádette kóshede jáne qoǵamdyq oryndarda jasalatyn ákimshilik quqyq buzýshylyqtardy anyqtaý jáne aldyn alý mindetterin qoıady. Aıtpaqshy, aldyńǵy qatardaǵy jáne jedel bólimshelerdiń kúshterimen «izin sýytpaı» 98 qylmysty jáne buryn jasalǵan 51 qylmysty ashty. Olardyń ishinde - qaraqshylyq, buzaqylyq, esirtki satý, bótenniń múlkin urlaý, alaıaqtyq, sýyq qarý men atys qarýyn zańsyz saqtaý faktileri jáne t.b. bar. Sondaı-aq, izdeýde bolǵan 16 adam ustaldy», - dedi, Almaty qalasy PD jergilikti polısıa qyzmeti basqarmasynyń bastyǵy, polısıa polkovnıgi Manap Sattarov.
Bul rette polısıa, quqyq buzýshylyq jasaǵany úshin shamamen 3 myń 500 adam ákimshilik jaýapkershilikke tartylǵanyn habarlady. Olardyń ishinde jıi kezdesetini - usaq buzaqylyq jáne qoǵamdyq oryndarda ishimdik ishý.
«Osy is-shara aıasynda turǵyn alqapqa aýla boıynsha aralaý júrgizilýde. 1 myń 378 úı, sonymen qatar jalǵa beriletin 2 myńǵa jýyq páter tekserildi. Sonymen qatar, JAİ kezinde jergilikti polısıa qyzmeti, tirkelgen jáne buryn sottalǵan azamattardy, al ıývenaldy polısıa qolaısyz otbasylardy mindetti túrde tekseredi. Bul jumystardyń barlyǵy respýblıkanyń eń iri shaharyndaǵy qylmystyq ahýaldy aıtarlyqtaı jaqsartady, sonymen qatar kez kelgen sıpattaǵy zańsyz áreketterdiń aldyn alady», - dep túıindedi, polkovnık Sattarov.