Qyzylordalyq kópbalaly ana Venera Taılaqbaeva Eýropa naryǵyna qamys shyǵaryp, qomaqty paıdanyń kózin tapty, - dep habarlaıdy almaty-akshamy.kz Massaget.kz-ke silteme jasap.
Veneranyń jasy 37-de, joldasy Raıysbek Aıapbergenovpen birge on bala tárbıelep otyr. Ekeýi temirjol salasynda eńbek etken. Biraq tapqany kúneltkenge jetpeı, basqa kiris kózin izdepti. Bul tyń ıdeıa oǵan koronavırýs pandemıasy kezinde kelgen. Osylaısha, ózi turatyn Qazaly aýdanynda qaýlap ósken qamysty kádege jaratý joldaryn jan-jaqty qarastyrady.
"Bul naryqty uzaq ári muqıat zerttedik. Áýeli Germanıa kásipkerlerine qamys satyp alýdy usyndyq. Shet elde ony joǵary baǵalaıdy. Turǵyn úı qurylysynda qoldanady. Kóp uzamaı Nıderland, Danıa, Fransıa, Polshadan tapsyrystar túse bastady. Ulybrıtanıa, Belarýsten de satyp alýshylar tabyldy. TMD memleketterimen de baılanys ornatqymyz keledi", - dedi kásipker.
Jumysy alǵa jyljyǵan olar "AzıaQamys" sharýashylyǵyn quryp, qaramaǵyna aýyldastaryn jınaǵan. 10-15 shaqty adam turaqty eńbekke tartylsa, ýaqytsha jumysqa 300-ge jýyq adam jumylady eken. Bir maýsymda orta eseppen 60-70 júk kóligi Eýropa asady.
Ónimdi jınaý, qabyldaý sıaqty sharýa Venera Taılaqbaevanyń jubaıynyń moınynda. Al sheteldiktermen kelissóz júrgizý, qujattardy retteý, qamys satýdy Venera óz mindetine alǵan. Kásipker áıel osy kásip úshin aǵylshyn tilin de az ýaqyt ishinde úırenip alǵan. Qazir nemis, fransýz tilderin meńgerip júr. Osylaısha, bıznesiniń geografıasyn keńeıtkisi keledi.
Sheteldikter tuzdy topyraqta ósken qamysty qýana-qýana qabyldapty.
"Germanıadan kelgen ınvestor Qazalydaǵy qamys ósetin jerdi kórdi. Sapasy jaǵynan talapqa saı kelgenine qýanyp ketti. Berik, qurǵaq ári uzyn. Olarǵa keregi osyndaı edi", - deıdi kásipker.
Venera Taılaqbaeva - qos qyzyl dıplomnyń ıesi. Sóıte tura, qamys kásibinen bereke taýyp júr. Aldaǵy ýaqytta qamysty óz elimizdiń kádesine jaratýdy da oılastyryp júr.