Bul adamdar eki aıǵa qamaldy.
Sybaılas jemqorlyqqa qarsy qyzmet QR júk vagony parkiniń iri operatory sanalatyn «Qaztemirtrans» aksıonerlik qoǵamynyń laýazymdy tulǵalaryn para aldy degen kúdikpen ustady, dep habarlaıdy Almaty-akshamy.kz Zakon.kz-ke silteme jasap.
Agenttiktiń baspasóz qyzmetiniń málimdeýinshe, turaqty túrde para alýdyń belgilengen sqemasyna fılıaldardyń qyzmetkerleri men basshylary, sondaı-aq bas keńse bólimsheleriniń menedjerleri men bastyqtary qatysqan.
«Qoǵamnyń jáne onyń óńirlik fılıaldarynyń laýazymdy tulǵalary júk vagondarynyń tapshylyǵyn paıdalana otyryp, keıbir jaǵdaılarda osyndaı tapshylyqty jasandy túrde jasaı otyryp, problemalardy sheshýdiń ornyna, osy jaǵdaıdy ózderiniń paıdakúnemdik maqsatyna paıdalanyp, ıaǵnı júk vagondaryn kedergisiz jáne jedeldetip bergeni úshin kásipkerlerden júıeli negizde para alǵany anyqtaldy», - delingen Sybaılas jemqorlyqqa qarsy is-qımyl agenttiginiń baspasóz qyzmeti taratqan aqparatta.
Aqsha qarajattary laýazymdy tulǵalardyń nemese olardyń senimdi adamdarynyń, onyń ishinde jaqyn týystarynyń kart-shottaryna aýdarylyp otyrǵan.
Vedomstvo ókilderi taratqan aqparatqa súıensek, aksıonerlik qoǵamnyń Aqmola fılıalynyń bir ǵana basshysy 2020 jyldan bastap 70 mıllıon teńgeden astam qarajatty zańsyz alyp, onyń basym bóligin Shýche-Býrabaı kýrorttyq aımaǵynyń oıyn mekemelerine jumsaǵan.
Qoǵamnyń Qaraǵandy fılıalynyń burynǵy jáne qazirgi basshylary da osyndaı qylmystar jasady degen kúdikke ilingeni belgili boldy.
«Bul adamdardyń barlyǵy ustalyp, tergeý sotynyń sanksıasymen 2 aıǵa qamaýǵa alyndy. Sondaı-aq aqshalaı qarajatty zańsyz alýda Qyzylorda fılıalynyń basshysy men aksıonerlik qoǵamnyń ortalyq apparatynyń birqatar qyzmetkeri áshkerelendi», - dep málimdedi Sybaılas jemqorlyqqa qarsy is-qımyl agenttiginiń baspasóz qyzmeti.
Agenttik osy qylmys boıynsha basqa laýazymdy tulǵalar tekserilip jatqanyn habarlady. QR QPK-niń 201-babyna sáıkes, tergeý múddesinde ózge aqparat jarıalaýǵa jatpaıdy.