Aq shýda qysyr bulttar emes, nóser tilegen kókala bas qorǵasyn bulttar shyń basyn qymtap alǵan.
Almatyda bıylǵy jaz jaýyn-shashyndy, naızaǵaıly bolyp, aýa raıy qubylmaly qalpyn áli saqtaýda. Alataýdyń basynan bult ketpeı tur. Bult bolǵanda da aq shýda qysyr bulttar emes, qorǵasyn tústes kókala bulttar. Taý bókterleri men shatqaldaryn salqyn samal enshilegen. Túnge qaraı tipti salqyndap ketetin kórinedi.
«Aldaǵy aptada aptap ystyqpen birge nóserli jaýyn, ókpek jel, salqyn samal bolýy ábden múmkin. Naızaǵaı oınap, kún kúrkireýi de ǵajap emes...» degenbiz ótken jolǵy paıymymyzda. Solaı boldy da, 24 maýsymda ekinti kezinde ekpindete bastalǵan nóser almatylyqtardyń esin shyǵardy...
Erteńnen bastap shilde aıy tabaldyryqtan attaıdy.
«Qurt, irimshik qaınaldy,
Qulyndar da baılandy.
Japyraqtar jalpaıdy,
Jas qozylar marqaıdy...», –
dep bastalatyn shilde kórinisi týraly tamasha jyr bar. Tabıǵat jyrshysy İlıas aqynnyń (Jansúgirov) «Jazǵy shilde» degen óleńi bul. Shilde óte ystyq aı, onyń ystyǵy 40 gradýska jetetin bolǵandyqtan ári 40 kúnge sozylatyndyqtan, burynǵylar «qyryq kún shilde» dep ataǵan. Maýsym aıynyń 26 juldyzynan tamyz aıynyń 5 juldyzyna deıin aýa raıy óte ystyq bolady. Iá, bul boljam boıynsha, qazaqy paıym osylaı deıdi. Al shyn máninde áli aspan tolyq ári turaqty ashylar emes, jańbyr basylar emes.
Ótip bara jatqan aıdyń 26-synan beri «Bas shilde» amaly júrip jatyr. Amal kezinde qapyryq ystyq bolady. Keıbir jyldary qońyrjaı qalypta ótedi. El arasyndaǵy aýa raıyn baqylaıtyn esepshiler bas shildeniń qalaı ótýine qarap, shilde aıyndaǵy kún raıyn boljaıtyn bolǵan.
«Arýdan asqan jan bar ma?
Jylqydan asqan mal bar ma?
Bıeniń súti – sary bal,
Qymyzdan asqan dám bar ma?», – dep, Aqtamberdi jyraý tolǵaǵandaı, el jaılaýlarynda qulyn baılanyp, bıe saýý júrip jatyr. Qymyzdyń júz aýrýǵa em ekenin dárigerler aıtyp júr.
Saýmal – sal aýrýlaryna, júrek pen asqazan jarasyna, baýyr men ókpe aýrýlaryna myń da bir shıpa. Býyn men qanazdyq dertine de daýa.
Búgin aı kúntizbesi boıynsha, jańa aıdyń 1-i. Al qoldanystaǵy kúntizbe aıdyń sońǵy kúnin – 30-yn kórsetip tur. Ár aıdyń ortasy men basqy kezi, álbette, ózgerissiz bolmaıdy. Demek, aldaǵy aptanyń jańbyrly bolatynyn meńzep tur.