Búgin – áskerı-ǵylymı qyzmetkerler men áskerı pedagog kúni. Bul kún Qorǵanys mınıstriniń 1997 jylǵy 24 qarashadaǵy «Qarýly kúshter úshin ǵylymı-pedagogıkalyq jáne ǵylymı kadrlar daıarlaý týraly» buıryǵynyń qabyldanýymen tikeleı baılanysty.
Áskerı beıindegi joǵary bilikti mamandar daıyndaý memlekettiń qorǵanys qabiletin qamtamasyz etý isinde úlken mańyzǵa ıe. Ol toǵyz áskerı oqý ornyn qamtıtyn otandyq áskerı bilim berý júıesi sheńberinde júzege asyrylady. Olardyń barlyǵy eldiń bilim berý keńistiginiń biryńǵaı normatıvtik-quqyqtyq jáne oqý-ádistemelik salasynda jumys isteıdi, dep habarlaıdy Almaty-akshamy.kz. Qorǵanys mınıstrligine silteme jasap.
Qorǵanys mınıstrliginiń Áskerı bilim jáne ǵylym departamenti osy saladaǵy úılestirýshi organ bolyp tabylady. Onyń quzyretine Qarýly kúshter úshin kásibı kadrlardy daıyndaý, áskerlerdiń jaýyngerlik jáne jumyldyrý daıyndyǵy mindetterin oıdaǵydaı sheshýge múmkindik beretin áskerı kadrlardy daıyndaý deńgeıin qamtamasyz etý kiredi.
Departament otandyq áskerı-ǵylymı mektepti nyǵaıtý jáne profesorlyq-oqytýshylar quramynyń dárejeliligin arttyrý boıynsha jumys júrgizedi.
«Jalpy áskerı bilim berý júıesi mamandardy daıyndaý sapasyn arttyrýǵa, oqytýdyń jańa baǵyttaryn ashýǵa, ınovasıalardy engizýge jáne ǵylymı-zertteý ortasyna ıntegrasıalaýǵa baǵyttalǵan. Ol úshin qorǵanys vedomstvosynda áskerı ǵylymdy sapaly jańa deńgeıge shyǵarýǵa múmkindik beretin qorǵanys jáne ǵylymı zertteýler júrgizýdiń jańartylǵan modeli qalyptasyp, iske asyrylýda», – dep atap ótti Áskerı bilim jáne ǵylym departamentiniń bastyǵy, áskerı ǵylymdar doktory, profesor general-maıor Jumabek Ahmetov.
Búgingi tańda pedagogıkalyq, ǵylymı-zertteý jáne ónertapqyshtyq korpýs 10 ǵylym doktory, 53 fılosofıa doktory (PhD) jáne 48 ǵylym kandıdatynan turady. Áskerı ǵalymdardyń ónertabystary men paıdaly tehnıkalyq modelderine berilgen 7 patenti, avtorlyq quqyq jáne zıatkerlik menshik týraly 23 kýáligi bar.
2021 jyldan 2022 jylǵa deıin olar 9 oqý quralyn, oqý prosesinde paıdalanylatyn 15 monografıany basyp shyǵardy. 240-tan astam ǵylymı maqala, onyń ishinde 44-i sheteldik basylymdarda jarıalandy. Granttyq jáne 2-baǵdarlamalyq-nysanaly qarjylandyrý sheńberinde 14 ǵylymı-zertteý jobasy iske asyrylýda.