Olar barlyq tapsyrmany 10 mınýt 33 sekýndta oryndaǵan.
Qazaqstandyq áskerıler Halyqaralyq armıa oıyndarynda «Artılerıadan oq atý sheberleriniń» túngi sprınt kezeńinde top jardy, dep habarlaıdy Almaty-akshamy.kz QR Qorǵanys mınıstrligine silteme jasap.
Qazaqstan komandasy barlyq tapsyrmany 10 mınýt 33 sekýndta oryndap, úzdik nátıje kórsetti. Ázirbaıjan áskerı qyzmetshileri ekinshi orynda (14 mınýt 15 sekýnd), reseılik artıllerıster úshinshi orynnan (16 mınýt 01 sekýnd) kórindi.
Aıta keter jaıt, Máskeý mańyndaǵy «Alabıno» polıgonynda «Tank bıatlony» baıqaýynyń ekinshi ekıpajdarynyń jarysynda qazaqstandyq tankıster taǵy da jeńiske jetti.
Tank komandıri, aǵa leıtenant Seıitjan Qobylanuly, kózdeýshi-operator serjant Baýyrjan Buǵybaev jáne mehanık-júrgizýshi efreıtor Jannur Jumabaevtardan turatyn ekıpaj kedergilerdi eńserip, atys tapsyrmalaryn sátti oryndap shyqty. Qazaq jaýyngerleri trassadan 26 mınýt 35 sekýndta óte bildi.
Ekinshi oryndaǵy Ózbekstan áskerı qyzmetshileriniń nátıjesi – 27 mınýt 23 sekýnd.
Halyqaralyq armıa oıyndary aıasynda Qazaqstanda úsh baıqaý ótkiziledi. Olar – «Artılerıadan oq atý sheberleri», «Merıdıan» jáne «Taktıkalyq mergen». Sońǵy ekeýi Qazaqstanda alǵash ret uıymdastyrylyp otyr.
Elimizde ótetin saıystarda barlyǵy 26 komanda baǵyn synaıdy. Olardyń ishinde Ázirbaıjan, Armenıa, Belarýs, Venesýela, Vetnam, Zımbabve, Qytaı, Qyrǵyzstan, Malı, Reseı, Tájikstan jáne Ózbekstannyń áskerıleri bar.
Jambyl oblysynyń Gvardeısk garnızonyndaǵy oqý-jattyǵý polıgonynda mınaatqysh eseptoptarynyń úzdikterdi anyqtalsa, Aqmola oblysynyń Shýchınsk qalasyndaǵy «Amandyq» polıgonynda áskerı topograftardyń saıysy ótedi. Al Qaraǵandy oblysynyń «Spassk» oqý-jattyǵý ortalyǵynda mergender jarysady.