Sońǵy 3 jylda balalar úıinde tárbıelenýshilerdiń sany 32%-ǵa qysqarǵan.
Elimizdegi balalar úıiniń búgingi ahýaly jóninde Qazaqstannyń Bilim jáne ǵylym mınıstri Asqat Aımaǵambetov Úkimet otyrysynda aıtyp berdi dep habarlaıdy Almaty-akshamy.kz mınıstrliktiń baspasóz qyzmetine silteme jasaı otyryp.
Asqat Aımaǵambetov mınıstrlik jetim balalar men ata-anasynyń qamqorlyǵynsyz qalǵan balalardyń quqyqtaryn qamtamasyz etý máselelerine erekshe nazar aýdaratynyn atap ótti.
Ol sońǵy 3 jylda balalar úıinde tárbıelenýshilerdiń sany 32%-ǵa (6223-ten 4254-ke deıin), al balalar úıi 30%-ǵa (138-den 96-ǵa deıin) qysqarǵanyn aıtyp jetkizdi.
Sonymen qatar bala asyrap alýshy ata-analar mektepteri jumysynyń nátıjesinde balalar úılerine qaıtarylǵan jetkinshekterdiń de sany azaıdy.
Jetim balalardy ornalastyrýǵa járdem kórsetý jónindegi uıymdardyń qyzmeti, olardy akredıtteýge qoıylatyn talaptar, sondaı-aq áleýetti asyrap alýshy ata-analardy mindetti daıarlaý rásimderi rettelgen.
«Atalǵan sharalardy engizý balalar úıinde tárbıelenetin balalar sanyn azaıtýǵa, sondaı-aq balalar úılerine qaıtarylǵan jetkinshekterdiń sanyn tómendetýge múmkindik berdi. Respýblıkada 23 063 jetim jáne ata-anasynyń qamqorlyǵynsyz qalǵan bala bar, olardyń 81,5%-y asyrap alýshy otbasylarda tárbıelenip jatyr», – dep atap ótti mınıstr Asqat Aımaǵambetov.
Sondaı-aq Bilim jáne ǵylym mınıstrligi ınklúzıvti bilim berýdi damytý úshin jumys júrgizip jatyr. Bilim alýda erekshe qajettilikteri bar balalardyń qurdastarymen qatar jalpy bilim beretin mektepte oqýyna jaǵdaı jasalyp jatyr. Bıyl erekshe qajettilikteri bar balalardy jan basyna qarjylandyrý ósedi. Bul balalardyń basym bóligin ınklúzıvti bilim berýmen qamtýǵa múmkindik beredi.
Sonymen qatar bıyl mektepterde alǵash ret pedagog-assıstent laýazymy engizildi. Olar bilim alýda erekshe qajettilikteri bar balalarǵa psıhologıalyq jáne pedagogıkalyq kómek kórsetedi.