Bul 4,4 mln zeınetaqy men járdemaqy alýshyǵa áser etedi.
2023 jyldyń 1 qańtarynan bastap Qazaqstandaǵy zeınetkerlerdiń járdemaqysy artty, dep habarlaıdy Almaty-akshamy.kz.
«2023 jylǵy 1 qańtardan bastap Qazaqstanda zeınetaqy men járdemaqylardyń barlyq túrleriniń mólsheri ósti. Bul 4,4 mln zeınetaqy men járdemaqy alýshyǵa áser etedi. Osy maqsattarǵa respýblıkalyq búdjette 4,6 trln teńge qarastyrylǵan», - delingen Eńbekmıni baspasóz qyzmetiniń habarlamasynda.
Bazalyq zeınetaqynyń mólsheri eń tómengi kúnkóris deńgeıiniń jyl saıynǵy ulǵaıýyn eskere otyryp, sondaı-aq, Memleket basshysynyń tapsyrmasyna sáıkes, onyń eń tómengi mólsheri eń tómengi kúnkóris deńgeıiniń 54%-dan 60%-ǵa deıin ulǵaıýyna baılanysty artty.
Yntymaqty zeınetaqy mólsheri ınflásıa deńgeıinen 2%-ǵa artyp kóterildi. Budan basqa, Memleket basshysynyń tapsyrmasyna sáıkes, yntymaqty zeınetaqyny esepteý úshin paıdalanylatyn eń joǵary tabys mólsheri 46-dan 55 AEK-ke deıin (158,7-den 189,8 myń teńgege deıin) ulǵaıtyldy.
Nátıjesinde búdjetten tólenetin zeınetaqy tólemderiniń eń tómengi mólsheri 68,2 myń teńgeden 77,4 myń teńgege deıin ósti. Zeınetaqynyń ósýi barlyq 2,2 mıllıon zeınetkerge áser etti.
Eń tómengi kúnkóris deńgeıiniń ulǵaıýyna baılanysty múgedektik jáne asyraýshysynan aıyrylǵan jaǵdaıda tólenetin járdemaqylardyń mólsheri de artty.
Aılyq eseptik kórsetkish (budan ári – AEK) mólsheriniń ulǵaıýyna baılanysty taǵy da birqatar járdemaqylardyń mólsheri ósti.
Máselen, jumys isteıtin de, jumys istemeıtin de áıelderge bala týýǵa baılanysty tólenetin memlekettik qoldaýdyń mólsheri endi: birinshi, ekinshi jáne úshinshi balaǵa 38 AEK nemese 131 100 teńge (2022 jyly – 120 840 teńge), tórtinshi jáne odan da kóp balaǵa 63 AEK nemese 217 350 teńgeni (2022 jyly - 200 340 teńge) quraıdy.
Respýblıkalyq búdjetten jumys istemeıtin ata-analarǵa bala kútimi boıynsha járdemaqy taǵaıyndalady, onyń mólsheri AEK ósýin eskere otyryp, bıyldan bastap 8,5%-ǵa ósti.
Jumys isteıtin ata-analar bala kútimi boıynsha áleýmettik tólemderdi Memlekettik áleýmettik saqtandyrý qorynan alady. 2023 jyldan bastap Prezıdent tapsyrmasy boıynsha bala kútimi boıynsha tólem merzimi bir jyldan bir jarym jylǵa deıin uzardy.
Múgedektigi bar balalardy qoldaý úshin Qazaqstanda kámeletke tolǵanǵa deıin arnaýly memlekettik járdemaqy tólenedi. Onyń mólsheri 2023 jyly 56 794 teńgeni (buryn 52 345 teńge) quraıdy.
Jańa jyldan bastap kóp balaly otbasylarǵa arnalǵan járdemaqy mólsheri AEK ulǵaıýyn eskere otyryp ósti: 4 balasy bar otbasylarǵa aı saıyn 55 304 teńge (buryn 50 976 teńge), 5 balaǵa – 69 138 teńge (buryn 63 728 teńge), 6 balaǵa – 82 973 teńge (buryn 76 479 teńge), 7 balaǵa – 96 807 teńge (buryn 89 231 teńge), 8 jáne odan kóp bala bolsa ár balaǵa – 13 800 teńgeden (buryn 12 720 teńge) beriledi.