Bul júıeni jetildire túsý qajet.
Elimiz densaýlyq saqtaý salasyndaǵy tehnologıalardyń tıimdiligin baǵalaıtyn mamandardy daıarlaýdy qolǵa aldy. Bul týraly QR Densaýlyq saqtaý mınıstrligine qarasty S. Qaıyrbekov atyndaǵy ulttyq ǵylymı densaýlyq saqtaýdy damytý ortalyǵynyń basqarma tóraǵasy Aleksandr Kostúk málim etti, dep habarlaıdy Almaty-akshamy.kz QazAqparatqa silteme jasap.
«Elimizde densaýlyq saqtaý tehnologıalaryn baǵalaý salasynyń mamandaryn daıarlaý jumystary júrip jatyr. Degenmen bul júıeni jetildire túsý qajet. Búginde ulttyq medısına ýnıversıteti tehnologıany baǵalaý mamandyǵy boıynsha magıstrlardy daıarlap jatyr. Kelesi jyly Astana medısınalyq ýnıversıtetinde de maman daıarlaýdy qolǵa almaqpyz», - dedi Aleksandr Kostúk densaýlyq saqtaý tehnologıalaryn baǵalaýdy damytý máselesine arnalǵan halyqaralyq ǵylymı-praktıkalyq konferensıa barysynda.
Onyń aıtýynsha, densaýlyq saqtaý tehnologıalaryn baǵalaý júıesi 2010 jyly bastaldy.
«Bul arnaıy mamandyq emes. Jalpy medısına mamandyǵynyń ishine kiredi. Sebebi baǵalaýdyń medısınaǵa tikeleı qatysy joq, ol densaýlyq saqtaý salasynyń saıasatyna qatysty jaıt», - deıdi ol.
Aıta keteıik, búgin elordada Shyǵys Eýropa jáne Ortalyq Azıa elderinde densaýlyq saqtaý tehnologıalaryn baǵalaýdy damytý máselesine arnalǵan halyqaralyq ǵylymı-praktıkalyq konferensıa ótip jatyr.
Atalǵan sharada densaýlyq saqtaý salasyn qarjylandyrý tıimdiligin arttyrý úshin densaýlyq saqtaý tehnologıalaryn baǵalaýdyń rólin arttyrý men oǵan qoıylatyn talaptardy ózgertý máseleleri qaralyp jatyr.
Buǵan deıin ulttyq ortalyq basshysy Qazaqstanda densaýlyq saqtaýǵa jan basyna shaqqanda 133,5 myń teńgeni quraıtynyn aıtty.