Almatynyń Túrksib aýdanynda shaǵyn bıznesti memlekettik qoldaý sharalary sátti júzege asyrylyp keledi, - dep habarlaıdy Aqshamnews.kz.
Sonyń ishinde negizgi quraldardyń biri kásipti endi bastaǵan kásipkerlerge arnalǵan 400 AEK kólemindegi qaıtarymsyz grant. Bul grant qajetti jabdyqtardy satyp alýǵa, jumys oryndaryn ashýǵa jáne jańa qyzmet túrlerin iske qosýǵa múmkindik beredi. Osylaısha, turǵyndardyń kásipkerlik belsendiligi men tabysy artady.
2025 jyly Túrksib aýdanyndaǵy Otbasyny qoldaý ortalyǵy bazasynda túrli bilim berý kýrstaryn 218 adam aıaqtap, qajetti bilim men kásipkerlik daǵdyny meńgerdi. 20 qatysýshy 400 AEK (1 572 800 teńge) kóleminde memlekettik grant ıegeri atanyp, kásibin bastaýǵa múmkindik aldy. Bul qoldaý sharalarynyń tıimdiligin kórsetetin mańyzdy kórsetkish jáne aýdannyń shaǵyn bıznesin damytýǵa qosqan qomaqty úles.
Grant ıegerleri jobalaryn túrli baǵytta júzege asyryp keledi. Atap aıtqanda: tigin isi, sport, bilim berý qyzmetteri, klınıng, sulýlyq salondary, paıdaly taǵam óndirisi, naýbaıhana jáne kondıterlik ister bar. Ásirese, tigin óndirisi salasy erekshe kózge túsip otyr: bıyl bul baǵytta 5 kásipker grant jeńip aldy. Olar sheberhanalaryn qajetti qural-jabdyqtarmen qamtamasyz etip, ulttyq buıymdar, mektep formasy jáne kúndelikti kıim sıaqty suranysqa ıe ónimder shyǵarýdy bastap ketti. Bul jobalar naryqty sapaly taýarlarmen qamtamasyz etip qana qoımaı, jumys oryndaryn ashýǵa jáne otbasylardyń tabysyn arttyrýǵa septigin tıgizip otyr.
