«Turǵylyqty jerine qaramastan, árbir balanyń bilim alýyna qolaıly jaǵdaı jasaý – memlekettiń mindeti»
Qasym - Jomart Toqaev, Qazaqstan Respýblıkasynyń Prezıdenti
Qazaqstanda turǵylyqty jerine qaramastan árbir balanyń sapaly bilim alýy úshin qolaıly, qaýipsiz ári jaıly jaǵdaılar jasaýǵa baǵyttalǵan turaqty memlekettik saıasat júrgizilip keledi. Buǵan sońǵy jyldary júzege asyrylyp jatqan aýqymdy memlekettik baǵdarlamalar da yqpal etýde, dep habarlaıdy aqshamnews.kz
Elde jańa mektepterdiń qurylysy buryn-sońdy bolmaǵan qarqynmen júrip jatyr. Memleket basshysynyń tapsyrmasy boıynsha bıyl tórtinshi jyl qatarynan jyl saıyn 1000-ǵa jýyq aýyl mektepteri modernızasıadan ótýde. Bul balalar úshin oqý jaǵdaılaryn jaqsartýǵa ǵana emes, sonymen qatar qala men aýyl mektepteri arasyndaǵy bilim berý sapasyndaǵy alshaqtyqty azaıtýǵa múmkindik beredi.
Sońǵy úsh jylda 4 myńnan astam mekteptiń materıaldyq-tehnıkalyq bazasy jańartyldy. 2 myńnan astam bilim berý uıymynda robototehnıka, hımıa, bıologıa, fızıka jáne STEM boıynsha zamanaýı pándik kabınetter ashyldy. Bir ǵana 2024 jyldyń qorytyndysyn alyp qarar bolsaq, 967 mektepte 1621 pándik kabınet jabdyqtaldy. Bul baǵyttaǵy jumystar áli de jalǵasýda, 2029 jylǵa qaraı elimizdiń mektepterinde keminde 7000 zamanaýı pándik kabınet ashý josparlanǵan.
Bilim berý sapasyn arttyrýdyń taǵy bir mańyzdy faktory - sıfrlyq tehnologıalardy engizý bolyp tabylady. Ulttyq bastamalar aıasynda mektep oqýlyqtarynyń 100%-y sıfrlyq formatqa kóshirildi, al mektepterdiń 95,2%-da joǵary jyldamdyqty ınternetke qoljetimdilik aıtarlyqtaı jaqsardy. Bilim berý platformalary engizilýde, jasandy ıntellekt elementteri oqý prosesine ıntegrasıalanýda. Osy sharalardyń barlyǵy oqýshylardy bolashaqtyń syn-qaterlerine daıyndaýǵa jáne olardyń boıynda erte jastan sıfrlyq daǵdylardy qalyptastyrýǵa baǵyttalǵan.
Bilim berý sapasy pedagogıkalyq qaýymdastyqtyń kásibılik deńgeıimen de tikeleı baılanysty. Osy turǵyda memleket tarapynan muǵalimderdi turaqty túrde qoldaý, olardyń mártebesin, materıaldyq áleýetin arttyrý boıynsha atqarylyp jatqan jumystardy da atap ótý kerek. 2020 jyldan bastap pedagogterdiń jalaqysy 2 esege artty, al biliktilik sanattary bar muǵalimderge ol úshin laýazymdyq jalaqysynyń 35%-dan 50%-ǵa deıin ústemeaqy tólenedi. Búginde orta bilim berý júıesinde jumys isteıtin 400 myń pedagogtiń 300 myńǵa jýyǵyna osyndaı ústemeaqylar tólenip keledi.
Aýyl muǵalimderin qoldaýǵa erekshe nazar aýdarylýda, olardyń jalaqysy qalalardaǵy áriptesterimen salystyrǵanda kem degende 25%-ǵa joǵary. Bul óńirlerge bilikti kadrlardy tartýǵa yqpal etedi.
2023 jyldyń qyrkúıeginen bastap Prezıdenttiń tapsyrmasy boıynsha barlyq bastaýysh synyp jáne áleýmettik osal toptar sanatyndaǵy oqýshylardy tegin ystyq tamaqpen qamtý engizildi. 1,7 mıllıon oqýshyny qamtamasyz etýge jergilikti búdjetterden 192 mlrd teńgeden astam qarajat bólindi. Sondaı-aq tamaqtaný sapasyn arttyrý maqsatynda asqana qyzmetkerlerine qoıylatyn talaptar kúsheıtildi, tegin tamaq alýshylardyń esebi avtomattandyryldy, kúndelikti baqylaý engizildi.
Sonymen qatar «Jalpyǵa birdeı bilim berý» qory aıasynda áleýmettik osal sanattaǵy 510 myńnan astam oqýshy mektep quraldarymen qamtamasyz etilgen.
2025 jyldan bastap jekemenshik mektepterdiń oqýshylary úshin de áleýmettik qoldaý sharalaryn engizý kózdelýde.