Qazaqstanda dárilik zattardyń sıfrlyq tańbalaý jáne qadaǵalaý júıesindegi dárilik aınalymnyń barlyq qatysýshylarynyń ıntegrasıasy aıaqtaldy.
Búgingi tańda júıede 19 otandyq taýar óndirýshi, 276 kóterme satý sýbektisi, 8000-nan astam dárihana jáne 1900-den astam medısınalyq uıym jumys isteıdi, dep habarlaıdy aqshamnews.kz.
İri dıstrıbútorlar tańbalanǵan preparattardyń 60,9 mln qaptamasyn ákelýdi júzege asyrdy, onyń 46 mln-y aınalymǵa engizildi. Dárihana uıymdary 48,4 mıllıon qaptama qabyldady, al aınalymnan shyǵarylǵan dári-dármekterdiń sany 29,2 mıllıon qaptamany qurady.
Sıfrlyq tańbalaý engizilgen sátten bastap, 2024 jylǵy 1 shildeden bastap otandyq óndiristiń 110,4 mln qaptamasy tańbalandy, 76,8 mln.aınalymǵa engizildi.
Bul rette QR Densaýlyq saqtaý mınıstrligi dárilik zattardy tańbalaý men qadaǵalaýdyń aqparattyq júıesinde (MPT AJ) dári-dármekterdi ýaqtyly qabyldaý men aınalymnan shyǵarýdyń turaqty monıtorıńin júzege asyrady.
Máselen, 2025 jyldyń naýryz aıynyń sońyndaǵy jaǵdaı boıynsha medısınalyq uıymdarda tańbalanǵan dárilik preparattardyń shyǵý deńgeıi 53,2%-dy qurady, bul qańtar aıynyń sońyndaǵy kórsetkishtermen salystyrǵanda 17,1%-ǵa joǵary. Dárihana uıymdarynda tańbalanǵan dárilik zattardyń aınalymynan shyǵarý uqsas kezeńde 24,3%-ǵa ósip, 60,3%-dy qurady.
Sonymen qatar, Densaýlyq saqtaý mınıstrligi tańbalaý operatorymen aınalymǵa qatysýshylardy oqytý jáne konsýltasıa berý boıynsha júıeli jumysty, sondaı-aq dári-dármek aınalymynyń barlyq kezeńderinde baqylaý tıimdiligi men ashyqtyǵyn arttyrý úshin aqparattyq júıelerdiń taldamalyq modýlderin jetildirý prosesin jalǵastyrýda.
Qazaqstanda barlyq dári-dármekterdi mindetti sıfrlyq tańbalaý 2024 jyldyń 1 shildesinen bastap engizilgenin - bul shara kontrafaktilik ónimdermen kúresýge jáne dári-dármekter naryǵynyń ashyqtyǵyn arttyrýǵa baǵyttalǵanyn esterińizge sala keteıik. 2024 jylǵy qarashada tańbalaý jáne qadaǵalaý júıesin odan ári damytý jónindegi jol kartasy bekitildi, onda jobanyń tehnıkalyq jáne uıymdastyrýshylyq damýynyń negizgi baǵyttary aıqyndaldy.