Bul tásil qolma-qol aqshasyz tólemderdi odan ári damytady.
Qazaqstan Ulttyq banki men Visa, Mastercard jáne UnionPay tólem kartalarynyń halyqaralyq júıeleri tólem kartalaryn (ıntercheındj mólsherlemelerin) paıdalana otyryp, qolma-qol aqshasyz tólemder boıynsha bankaralyq ishki ulttyq komısıa mólsherlemeleriniń shekti mólsherin tómendetý boıynsha birlesken sharalar qabyldaý máseleleri jónindegi kelisimge qol qoıdy, dep habarlaıdy Almaty-akshamy.kz.
Ulttyq banktiń resmı saıtyndaǵy málimeti boıynsha, Qazaqstanda jumys isteıtin Tólem kartalarynyń halyqaralyq júıeleri ıntercheındj mólsherlemelerin birden 2 ese tómendetýge mindetteledi.
Shekti mólsherlemeler tómendegen kezde kezeń-kezeńimen tómendetý tásili qoldanylady. Birinshi kezeń 2024 jyly 1 qańtarda, al ekinshi kezeń – 2025 jyly 1 qańtarda bastalady:
jappaı segmentte (Classic, Gold jáne basqalary) birinshi kezeńde shekti mólsherlemeler qazirgi mólsherlemeden (1,80%-2,0%-dan) 1,50%-ǵa deıin, ekinshi kezeńde – 1,0%-ǵa deıin tómendeıdi;
premıým segmentte (Platinum, World jáne basqalary) birinshi kezeńde qazirgi mólsherlemelerden (shamamen 2,40%-dan) 1,80%-ǵa deıin, ekinshi kezeńde – 1,20%-ǵa deıin tómendetý kózdeledi;
sýper premıým segmentte (Infinite, World elite, Diamond jáne basqalary) birinshi kezeńde mólsherlemeler qazirgi mólsherlemeden (shamamen 2,45%-dan) 2,0%-ǵa deıin, ekinshi kezeńde – 1,40%-ǵa[1] deıin tómendeıdi.
Qolma-qol aqshasyz kartalyq tólemder boıynsha bankaralyq komısıalardyń tómendeýi tólem ındýstrıasynyń odan ári damýyna oń yqpal etedi jáne bank komısıalaryn tóleýge bıznes sýbektileriniń shyǵyndaryn qysqartady. Bul tásil qolma-qol aqshasyz tólemderdi odan ári damytyp, «kóleńkeli ekonomıkanyń» azaıýyna oń áserin tıgizedi.
Anyqtama úshin: ıntercheındj degenimiz – saýda-servıstik kásiporyndarǵa qyzmet kórsetetin ekvaıer-bankter qolma-qol aqshasyz tólemderdi qabyldaý kezinde tólem kartasynyń emıtent-bankke tólenetin ekvaırıńtik komısıanyń bir bóligi.