Túzetýlerdi úsh negizgi baǵytqa bólýge bolady.
Qarashanyń 3 kúni Senattyń jalpy otyrysynda «Qazaqstan Respýblıkasynyń keıbir konstıtýsıalyq zańdaryna Memleket basshysynyń 2022 jylǵy 16 naýryzdaǵy Joldaýyn iske asyrý máseleleri boıynsha ózgerister men tolyqtyrýlar engizý týraly» QR Konstıtýsıalyq Zańy qabyldandy, dep habarlaıdy Almaty-akshamy.kz QazAqparatqa silteme jasap.
«Zań jobasynyń maqsaty – Prezıdenttiń ókilettigin qysqartý, Parlament palatalaryn qalyptastyrý tártibin jáne onyń birqatar fýnksıalaryn qaıta qaraý, Parlamenttegi zań shyǵarý prosesiniń jańa erejeleri, aralas saılaý júıesine kóshý, sondaı-aq saılaý prosesin jańǵyrtý bóliginde Joldaý aıasyndaǵy saıası reformalardyń tolyqqandy iske asyrylýyn qamtamasyz etý. Túzetýlerdi úsh negizgi baǵytqa bólýge bolady. Birinshiden, zań jobasy Prezıdenttiń jergilikti atqarýshy organdardyń aktilerine qatysty ókilettikterin qysqartýǵa jáne barlyq deńgeıdegi ákimderdi bosatýǵa qatysty erejelerdi qamtıdy. Sondaı-aq, Parlament Senatynyń depýtattaryn, Konstıtýsıalyq sottyń jáne Joǵary sot keńesiniń tóraǵalaryn taǵaıyndaý jónindegi Prezıdenttiń ókilettikterin ózgertýge qatysty túzetýler kózdelgen», - dedi QR Ádilet mınıstri Qanat Mýsın.
Sonymen qatar, Parlament palatalarynda zańdardy qaraý jáne qabyldaý tártibin qaıta qaraýǵa qatysty túzetýler bekitiledi.
«Aralas saılaý júıesine kóshýge baılanysty depýtatty keri qaıtaryp alý tetigin qosa alǵanda, Parlament Májilisinde jáne máslıhattarda aralas saılaý júıesiniń jumys isteýine baǵyttalǵan erejelerdi saılaý zańnamasynda qamtý usynylady. Sonymen qatar, saılaý prosesin jetildirý boıynsha túzetýler qarastyrylǵan. Olar: áleýmettik jelilerde úgit júrgizýge ruqsat berý, saılaý qorlaryna erikti negizdegi qaıyrymdylyqtyń shekti mólsherin belgileý. Budan basqa, aýdandar men oblystyq mańyzy bar qalalardyń ákimderin saılaý kezeń-kezeńimen engiziledi. Bul tásilderdiń barlyǵy egjeı-tegjeıli jáne jan-jaqty talqylandy», - dedi mınıstr.
Óz kezeginde Serat tóraǵasy Máýlen Áshimbaev atalǵan zań arqyly birqatar mańyzdy quqyqtyq normalar Konstıtýsıanyń jańa erejelerine sáıkestendiriletinin aıtty.
«Máselen, el Prezıdentiniń ókilettik merzimi bir rettik 7 jyldyq kezeńmen shekteledi. Sonymen qatar, Májilis pen máslıhattardy qalyptastyrýdyń aralas úlgisin engizýge quqyqtyq negiz qalyptastyrdyq. Qabyldanǵan zań ákimderdi saılaý júıesin aýdandar men oblystyq mańyzy bar qalalarda kezeń-kezeńmen qoldaný máselelerin de qamtıdy. Senat pen Májilistiń zań shyǵarý prosesindegi qyzmetterine qatysty jańa normalar qabyldandy», - dedi M. Áshimbaev.
Zań jobasynda Qazaqstan Respýblıkasynyń 8 Konstıtýsıalyq zańyna túzetýler engizý kózdelgen.
Sonymen qatar, «Qazaqstan Respýblıkasynyń Parlamenti jáne onyń depýtattarynyń mártebesi týraly» Konstıtýsıalyq zańǵa Senatty qalyptastyrý tártibin jáne onyń birqatar fýnksıalaryn qaıta qaraýǵa, aralas saılaý júıesin engizýge, Májilistegi Qazaqstan halqy Assambleıasynyń kvotasyn alyp tastaýǵa, Parlament palatalarynda zańdardy talqylaý jáne qabyldaý tártibin qaıta qaraýǵa, Úkimettiń zań kúshi bar ýaqytsha normatıvtik quqyqtyq aktilerdi qabyldaýyna qatysty jáne basqa da normalar engizilgen.
«Qazaqstan Respýblıkasyndaǵy saılaý týraly» Konstıtýsıalyq zańda kózdelgen túzetýler Májilis pen máslıhattar depýtattaryn majorıtarlyq júıe boıynsha saılaý, majorıtarlyq júıe boıynsha saılanǵan Májilis pen máslıhattar depýtattaryn keri shaqyrtyp alý, aýdandar men oblystyq mańyzy bar qalalardyń ákimderin saılaý, aýmaqtyq saılaý komısıalaryn kásibı negizge aýystyrý, saılaý aldyndaǵy úgit kezeńinde áleýmettik jelilerdegi úgit jónindegi, sondaı-aq saılaý qorlaryna beriletin qaıyrymdylyqtardyń shekti mólsherine, saılaý naýqanyna qatysýshylardyń barlyǵynyń qarjylyq ashyqtyǵyn qamtamasyz etýge qatysty sharalar jónindegi erejelerdi zańnamalyq retteýge baǵyttalǵan.