QR BǴM baspasóz qyzmetiniń málimetinshe, olımpıadanyń ekinshi kezeńi 22 aqpanǵa deıin jalǵasady, úshinshisi – oblystyq kezeń 2022 jyldyń 28 aqpany men 5 naýryz aralyǵynda ótedi.
Qazaqstanda jalpy bilim beretin pánder boıynsha respýblıkalyq olımpıadanyń aýdandyq kezeńi bastaldy, dep habarlaıdy Almaty-akshamy.kz
Bıyl zıatkerlik jarystar alǵash ret elektrondy formatta ótip jatyr. Jańashyldyq olımpıadalardyń ótýiniń ashyqtyǵyn qamtamasyz etýge baǵyttalǵan. Oǵan 291 aýdannan (qaladan) shamamen 100 myń oqýshy qatysady.
«Olımpıadalardyń barlyq kezeńi elektrondy formatta ótedi. Bilim jáne ǵylym mınıstri UBT-nyń, olımpıadalardyń jáne t.b. sharalardyń ashyq túrde ótýine asa mán beredi. Ótken jyly alǵash ret respýblıkalyq kezeń elektrondyq formatqa kóshirildi. Biraq aýdandyq kezeńdi ótkizý kezinde zıatkerlik saıystardyń nátıjeleri boıynsha ata-analar tarapynan shaǵymdar boldy, óıtkeni aýdandyq jáne oblystyq kezeńder qaǵaz túrinde ótkizildi. Ol kezde qatysýshylarǵa tapsyrmalary bar mórlengen konvert berildi, balalar tapsyrmalardy dápterlerde oryndady. Endi oqýshylar arasyndaǵy respýblıkalyq olımpıadanyń barlyq týryn ótkizý prosesiniń ashyqtyǵy men shynaıylyǵyn qamtamasyz etý úshin jarystar elektrondyq formatta ótkiziledi. Bul tapsyrmalardyń taralý qaýpin azaıtady jáne belgili bir qatysýshylardyń múddelerin qoldaıdy. Ótken jyly biz halyqaralyq olımpıadalarda medal alýdan rekord ornattyq. Sondaı-aq bul - ádil irikteýdiń nátıjesinde qol jetkizgen kórsetkish. Qazir biz osy jetistikterdi arttyrý úshin aýqymdy jumys atqaramyz», – dep atap ótti «Daryn» respýblıkalyq ǵylymı-praktıkalyq ortalyǵynyń dırektory Tımýr Nurkeshov.
Jalpy bilim beretin pánder boıynsha respýblıkalyq olımpıada proktorıng júıesin paıdalana otyryp, «Oqylyq» platformasy arqyly ótedi. Oqýshylarǵa tapsyrmalardy alý úshin jaýap blankisi, jeke logın jáne paról beriledi. Olımpıada «1 kompúter – 1 oqýshy – 1 kamera» prınsıpi boıynsha ótkiziledi. Bul rette jarystardyń beınejazbasy jáne tikeleı kórsetilimi júrgiziledi.
Aýdandyq (qalalyq) kezeńniń jeńimpazdary respýblıkalyq olımpıadanyń kelesi oblystyq kezeńine qatysady. Aıta keteıik, QR BǴM «Daryn» RǴPO elimizdiń daryndy oqýshylaryn anyqtaý, damytý jáne kásibı qoldaý salasyndaǵy flagman bolyp tabylady.
Búginde ortalyq ártúrli deńgeıdegi 70-ten astam pándik olımpıadalardy uıymdastyrady jáne ótkizip keledi. Ótken jyly qazaqstandyq oqýshylar halyqaralyq olımpıadalarda jeńimpaz atanyp, Qazaqstannyń qorjynyna 26 medal ákeldi.
Memleket basshysy daryndy balalardy qoldaý boıynsha tıisti sharalar qabyldaýdy tapsyrdy. Mınıstrlik UBT tapsyrmaı-aq birjolǵy syılyqaqylar men bilim berý granttaryn tóleýdi usyndy.
Altyn medal ıegerleri 1500 AEK, kúmis medal 1000 AEK, qola medal 500 AEK kóleminde syıaqy alady. Sondaı-aq jeńimpazdardy daıyndaǵan pedagog-jattyqtyrýshylarǵa da syılyqtar qarastyrylǵan.