Atalmysh naýqan osy jyldyń sońyna deıin jalǵasady.
Qazaqstannyń áskerı qurylymdarynyń qatary 18-27 jas aralyǵyndaǵy 17 myń jas azamatpen tolyǵady. Birinshi qyrkúıek kúni áskerge shaqyrý naýqany bastaldy, dep habarlady Almaty-akshamy.kz.
«Jergilikti atqarýshy organdar, «Áskerı qyzmet jáne áskerı qyzmetshilerdiń mártebesi týraly» QR Zańyna sáıkes, azamattardy merzimdi áskerı qyzmetke shaqyrýdy uıymdastyryp, qamtamasyz etedi. Áskerge alynǵan kúnnen bastap 12 aı qyzmet atqarǵan áskerı qyzmetshilerdi zapasqa shyǵarý da josparly tártippen júrgiziledi», – delingen Qorǵanys mınıstrliginiń baspasóz qyzmetiniń habarlamasynda.
Mamandardyń aıtýynsha, ekinshi jyl qatarynan áskerge shaqyrý naýqany pandemıa jaǵdaıynda ótýde. Koronavırýsty juqtyrý qaýpin azaıtý úshin áskerge shaqyrylýshylardy habardar etý Sıfrlyq damý, ınovasıalar jáne aeroǵarysh ónerkásibi mınıstrliginiń 1414 qyzmetimen SMS-habarlamalar jiberý arqyly júzege asyrylady.
Vırýstyq ınfeksıadan qosymsha qorǵanys PTR-tekserý bolyp tabylady. Áskerge shaqyrylýshylardy eki ret tekseredi. Áskerge shaqyrý kezinde jınaý pýnktterinde jáne áskerı bólimderge jańa tolyqtyrýlar kelgennen keıin.
«Barlyq suraqtar boıynsha azamattar elektrondyq poshta nemese qorǵanys isteri jónindegi departamentterdiń áleýmettik jelilerdegi resmı akkaýnttary arqyly habarlasa alady. Sybaılas jemqorlyq kórinisteri týraly habarlamalar «Qarýly Kúshter – adaldyq alańy» jobalyq keńselerinde jáne senim telefondary arqyly qabyldanady», – dep túsindirdi Qarýly Kúshter Bas shtaby uıymdastyrý-jumyldyrý jumystary departamentiniń bastyǵy, polkovnık Sáken Júsipov.
Áserı mamandardyń málimeti boynsha, óńirlerdegi áskerge shaqyrý komısıalaryn oblys, qala jáne aýdan ákimderiniń orynbasarlary basqarady. Olar áskerge shaqyrý komısıasynyń sheshimimen nemese medısına mamandarynyń qorytyndylarymen kelispegen azamattardyń ótinishterin qaraıdy.