Joldaý joǵary oqý oryndaryna zor mindet júktedi.
Memleket basshysy Qasym-Jomart Toqaevtyń Qazaqstan halqyna arnalǵan «Jańa jaǵdaıdaǵy Qazaqstan:İs-qımyl kezeńi» Joldaýyn Qazaq ınjenerlik-tehnologıalyq ýnıversıtetiniń ujymy Bilim kúnine arnalǵan saltanatty jıyn barysynda tyńdady, dep habarlaıdy Almaty-akshamy.kz ýnıversıtettiń baspasóz qyzmetine silteme jasap.
Joldaýda joǵary oqý oryndarynyń aldyna, maman daıyndaý salalary aıasynda aıtylǵan júkteýlerge toqtalyp ótken QazITÝ rektory Gúlnar Sársenbekova Joldaýdyń Bilim kúni qarsańynda oryn alýy jaıdan-jaı emestigin, qaı memlekettiń de órkenıettiligi eń birinshi bilimmen anyqtalatyndyǵynyń aıǵaǵy ekendigin aıtty. Sondaı-aq ol 1 qyrkúıek kúni Prezıdent júktegen maqsat-mindetterdiń eń bastysy – qaı salada bolsa da sapaly mamannyń qajettiligi ekendigin jetkizdi.
«Prezıdenttiń «Qazaqstannyń aldynda turǵan asa mańyzdy mindet – ónerkásiptik áleýetimizdi tolyq paıdalaný» degen talaptardyń údesinen shyǵý úshin aýyl sharýashylyǵy jáne ónerkásip salalarynda myqty maman-kadrlardy daıyndaýǵa erekshe serpin berý - ýnıversıtetterdiń basty atqarar mindeti dep túsinemin», - dep atap ótti Gúlnar Sársenbekova.
Qazaq ınjenerlik-tehnologıalyq ýnıversıtetiniń basshysy Prezıdenttiń «Aýyl sharýashylyǵyn damytpaı, básekege qabiletti ekonomıka qurý múmkin emes» degen tapsyrmasy osy salada tikeleı mamandar daıarlap otyrǵan atalmysh oqý oornyna úlken jaýapkershilik júkteıtinin atady.
Rektor Joldaýda fınans, aqparattyq tehnologıalar jáne aýyl sharýashylyq salalaryna mamandardy daıyndaý erekshelikteri men artyqshylyqtaryna erekshe mán berilgendigine toqtaldy. Sondaı-aq bilim ordasynyń basshysy osy salada mamandardy daıyndaýda oqý baǵdarlamalarynyń mazmunyn únemi arttyrý ýnıversıtet damý baǵdarlamasynyń negizgi baǵyty ekendigin aıtyp, atalǵan mamandyqtarǵa oqýǵa túsken stýdentterge sáttilik tiledi.
Saltanatty jıynǵa oqytýshy-professorlar quramy, ǵalymdar, stýdentter jáne ata-analar qatysty.