Jabylý sebebi – kolejderdi ońtaılandyrý.
Bul týraly QR BǴM Tehnıkalyq jáne kásiptik bilim berý departamentiniń dırektory Nasymjan Ospanova málim etti, dep habarlaıdy Almaty-akshamy.kz
«Sońǵy jyldary elimiz boıynsha 18 kolej jabyldy. Olardyń jabylý sebebi lısenzıamen baılanysty emes, kolejderdi ońtaılandyrý maqsatynda osyndaı shara qoldanyldy. Iaǵnı keıbir kolejderdiń qyzmetin qaıta qaraý kerek boldy. Negizinen bul shara jeke kolejderge qatysty boldy», - dedi Nasymjan Ospanova.
Departament basshysynyń málimdeýinshe, kolejderde bilim berý sapasyn arttyrý maqsatynda birqatar shara iske asyryldy.
«Aldymen bilim baǵdarlamasyn ázirleýde kolejderge akademıalyq erkindik berildi. Bilim baǵdarlamasyn zaman men naryqtyń suranysyna saı etip daıyndaý kerek. Árıne, bilim berý týraly zańnyń sheńberinde ázirlenedi. Endigi ýaqytta oqý orny jumys berýshimen, bilim berý baǵdarlamasyn naqty mamandyq pen qajetti bilim-bilikti negizge ala otyryp birlesip ázirleıdi. Sodan soń atalǵan bilim berý baǵdarlamasy saraptamadan ótip, keıin baǵdarlamalar reestrine tirkeledi», - deıdi ol.
Onyń aıtýynsha, atalǵan jańashyldyqty iske asyrý bastalyp ketti, onyń alǵashqy nátıjesi bıyl qyrkúıekte daıyn bolady.