Qasym-Jomart Toqaev Ivan Korchoktyń Qazaqstanǵa saparynyń mańyzdylyǵyna toqtalyp, bul kezdesý ekijaqty yntymaqtastyqty damytýǵa tyń serpin beretinin atap ótti.
Kezdesý barysynda saýda-ekonomıkalyq jáne ınvestısıalyq yntymaqtastyqty nyǵaıtýǵa baǵyttalǵan Qazaqstan-Slovakıa qatynastarynyń perspektıvalary talqylandy, dep habarlaıdy Almaty-akshamy.kz
Sondaı-aq Aýǵanstandaǵy jaǵdaıdy turaqtandyrýǵa qatysty aımaqtyq qaýipsizdik máseleleri qarastyryldy.
«Sizdiń saparyńyz Qazaqstandaǵy tarıhı dataǵa sáıkes kelip otyr. Eki aıdan keıin el Táýelsizdiginiń 30 jyldyǵyn atap ótemiz. Kelesi jyly Slovakıa da osyndaı tarıhı mejege jetedi. 2019 jyly biz Bratıslavada elshilik ashtyq. Bul bizdiń kóptegen baǵyt boıynsha tyǵyz yntymaqtastyq ornatýǵa beıildi ekenimizdi kórsetedi», – dedi Qasym-Jomart Toqaev.
Prezıdent mınıstrge Qazaqstanda COVID-19 indetine qarsy kúres boıynsha qabyldanǵan sharalar, Aýǵanstandaǵy jaǵdaıdy turaqtandyrý men osy elge kórsetilip jatqan gýmanıtarlyq kómek týraly aıtty.
Ivan Korchok Qasym-Jomart Toqaevqa kezdesýge múmkindik bergeni úshin rızashylyǵyn bildirip, kele jatqan Táýelsizdik mereıtoıymen quttyqtady.
Mınıstr Prezıdenttiń Qazaqstandy jańǵyrtý isindegi kóshbasshylyq qabiletin, halyqtyń ál-aýqatyn arttyrýdaǵy jáne memlekettiń qaýipsizdigin nyǵaıtýdaǵy eńbegin Slovakıa basshylyǵy joǵary baǵalaıtynyn jetkizdi.
Kezdesý sońynda Qasym-Jomart Toqaev Slovakıa basshysy Zýzana Chapýtovaǵa sálemin joldap, onyń kelesi jyly Qazaqstanǵa saparmen keletinine úmittenetinin aıtty.