Memleket basshysy Qasym-Jomart Toqaev Qos Kıeniń saqshysy – Saýd Arabıasynyń Koroli Salman ben Ábdelazız Ál Saýdtyń shaqyrýymen Djıdda qalasyna resmı saparmen keldi, dep habarlaıdy Almaty-akshamy.kz Inform.kz-ke silteme jasap.
Qazaqstan Prezıdentin áýejaıda Koróldiń keńesshisi ári Mekke provınsıasynyń gýbernatory Feısal Halıd ben Ábdelazız, sondaı-aq Saýd Arabıasy Koróldiginiń Qorshaǵan ortany qorǵaý, sý resýrstary jáne aýyl sharýashylyǵy mınıstri Abdýrahman Ál-Fadlı qarsy aldy.
Sodan keıin Prezıdent resmı kezdesý ótkizý úshin Koróldiń «Qasr As-Salam» saraıyna bardy. Qurmet qaraýylynyń bastyǵy eki el basshylaryna raport berdi. Qazaqstan men Saýd Arabıasynyń ánurandary shyrqalǵannan keıin Qasym-Jomart Toqaev pen Taq murageri Muhammed ben Salman ben Ábdelazız Ál Saýdqa resmı delegasıalardyń músheleri tanystyryldy.
Budan keıin Memleket basshysy men Taq murageri kelissóz júrgizdi. Qasym-Jomart Toqaev Muhammed ben Salman ben Ábdelazız Ál Saýdqa iltıpat bildirip, shaqyrǵany jáne qonaqjaılyq kórsetkeni úshin Saýd Arabıasynyń Koroli men Taq muragerine alǵys aıtty.
Qazaqstan Prezıdentiniń aıtýynsha, Memleket basshysy retinde Saýd Arabıasyna alǵash ret kelgendikten, bul sapardyń mańyzy zor. Qasym-Jomart Toqaev Saýd Arabıasy Qazaqstannyń basty strategıalyq seriktesteriniń biri ekenin atap ótti.
– Saýd Arabıasy – Qazaqstannyń táýelsizdigin birinshi bolyp moıyndaǵan elderdiń biri. Osy kezeńde túrli baǵyttaǵy yntymaqtastyǵymyz nyǵaıa tústi. Qazir qazaq-saýd qatynastary joǵary deńgeıde. Degenmen, eki el arasyndaǵy yntymaqtastyqqa tyń serpin beretin kez keldi. Bul – elderimizdiń múddesine saı keletin ortaq sheshim. Bizdiń ózara tıimdi baılanystarymyz nyǵaıa beredi dep senemin, – dedi Memleket basshysy.
Kelissóz barysynda saýda-ekonomıkalyq jáne ınvestısıalyq yntymaqtastyq máseleleri talqylandy. Qazaqstan Saýd ınvestorlary úshin ózara múddeni kózdeıtin túrli perspektıvti salalar boıynsha erekshe sharttar men keń kólemde artyqshylyqtar usynýǵa daıyn. Taraptar ózara taýar aınalymyn edáýir arttyrýǵa nıetti ekenin jáne jýyq arada eki el úkimetteriniń bul baǵyttaǵy jumystardy jandandyratynyn naqtylady. Muhammed ben Salman ben Ábdelazız Ál Saýd elderimiz arasyndaǵy qatynastar deńgeıi jaqsy ekenin atap ótip, ony ári qaraı nyǵaıtyp, damytý úshin múmkindikter mol ekenin aıtty.
Sondaı-aq bul baǵyttaǵy jumystardy jandandyrý qajet ekenine toqtaldy. Onyń aıtýynsha, bul rette Qazaqstan men Saýd Arabıasynyń bıznesmenderin biriktiretin İskerlik keńestiń róli zor bolmaq. Taq murageri Memleket basshysynyń resmı sapary aıasynda ótetin Investısıalyq dóńgelek ústelge Koróldiktiń iri kompanıalarynyń ókilderi qatysatynyn jetkizdi.
Onyń aıtýynsha, qazirgi jaǵdaıda Saýd Arabıasynyń Memlekettik ınvestısıalyq qory úılestiretin birqatar joba boıynsha birlesken jumys mańyzdy sanalady. Atap aıtqanda, Muhammed ben Salman ben Ábdelazız Ál Saýd Koróldiktiń kompanıalary Qazaqstannyń agrarlyq salasyna ınvestısıa salýǵa qyzyǵýshylyq tanytyp otyr. Onyń pikirinshe, bul baǵyt jahandyq azyq-túlik daǵdarysy jaǵdaıynda asa ózekti bola túsedi. Qasym-Jomart Toqaev Taq muragerin Qazaqstanǵa memlekettik saparmen kelýge shaqyrdy.
Muhammed ben Salman bul shaqyrýdy qýana qabyldaıtynyn aıtyp, qol jetkizilgen ýaǵdalastyqtardy júzege asyrýdyń naqty nátıjelerin talqylaý úshin Qazaqstanǵa saparmen kelýge daıyn ekenin jetkizdi.