Olar halyqaralyq jáne aımaqtyq kún tártibindegi ózekti máseleler jóninde pikir almasyp, halyqaralyq uıymdar aıasyndaǵy ózara is-qımyldardy talqylady.
Qasym-Jomart Toqaev Brússelge resmı sapary aıasynda Belgıanyń Premer-Mınıstri Aleksandr De Kroomen kelissóz júrgizdi, dep habarlaıdy Almaty-akshamy.kz
Kezdesý barysynda taraptar saıası, saýda-ekonomıkalyq, ınvestısıalyq jáne gýmanıtarlyq salalar boıynsha Qazaqstan men Belgıa arasyndaǵy qarym-qatynastardyń damý perspektıvalaryn jan-jaqty qarastyrdy. Sondaı-aq olar halyqaralyq jáne aımaqtyq kún tártibindegi ózekti máseleler jóninde pikir almasyp, halyqaralyq uıymdar aıasyndaǵy ózara is-qımyldardy talqylady.
Qasym-Jomart Toqaev Prezıdent bolyp saılanǵaly Belgıaǵa alǵash ret resmı saparmen kelip otyrǵanyn aıtty.
Memleket basshysy Qazaqstannyń Belgıany Eýropalyq Odaqtaǵy saıası jáne ekonomıkalyq turǵydan mańyzdy seriktes sanaıtynyn jetkizdi.
Kezdesý barysynda taraptar saýda-ekonomıkalyq jáne ınvestısıalyq yntymaqtastyqty nyǵaıtýǵa erekshe nazar aýdardy. Memleket basshysynyń aıtýynsha, Belgıa – elimizdiń ekonomıkasyna ınvestısıa salý jóninen altynshy oryndaǵy memleket. 2005 jyldan beri Belgıa ınvestısıasynyń jalpy mólsheri 9,3 mıllıard AQSH dollaryna jetti. Pandemıaǵa qaramastan, ózara saýda kólemi 13 paıyzǵa ósip, 300 mıllıon dollardan asty. Qazaqstanda belgıalyq kapıtaldyń qatysýymen 65 zańdy tulǵa, fılıaldar men ókildikter jumys isteıdi.
Ekonomıkalyq baılanystardy jandandyrý maqsatymen Saýda-ekonomıkalyq yntymaqtastyq jóninde úkimetaralyq komısıa qurý týraly ýaǵdalastyqqa qol jetkizildi.
Sonymen qatar taraptar koronavırýs pandemıasyna qarsy kúres boıynsha yqpaldastyq ornatý máselesin qarastyrdy. Memleket basshysy Belgıanyń Premer-Mınıstrine qazaqstandyq QazVac vaksınasynyń jasalǵany týraly aıtty. Qasym-Jomart Toqaev belgıalyq bıofarmasevtıka salasynyń damý deńgeıin joǵary baǵalap, QazBioPharm ulttyq holdıńi men jaqynda qurylǵan belgıalyq bıofarmasevtıkalyq platforma arasynda yntymaqtastyq ornatýdy usyndy.
Áńgimelesý barysynda taraptar Glazgodaǵy SOR26 samıtiniń qorytyndylary boıynsha klımattyń ózgerýine qatysty máselelerdi talqylap, kómirtegi beıtaraptyǵyna qol jetkizý úshin ulttyq deńgeıde qabyldanyp jatqan sharalarǵa toqtaldy.
Kezdesýde qaýipsizdikti qamtamasyz etý, terorızmge, adam saýdasy men zańsyz mıgrasıaǵa qarsy kúres máseleleri de sóz boldy. Qasym-Jomart Toqaev Qazaqstannyń Aýǵanstanǵa gýmanıtarlyq kómek kórsetý úshin qabyldap jatqan sharalary týraly aıtyp berdi.
Memleket basshysy EýroOdaqpen aımaqtyq deńgeıdegi baılanystar jóninde aıta kelip, «Qazaqstan – EýroOdaq» jáne «Ortalyq Azıa – EýroOdaq» formattary boıynsha Belgıamen tyǵyz yntymaqtastyq ornatýǵa daıyn ekenin naqtylady. Osy rette Qazaqstan men EýroOdaq arasyndaǵy Keńeıtilgen seriktestik jáne yntymaqtastyq týraly kelisimniń, sondaı-aq EýroOdaqtyń Ortalyq Azıa jónindegi jańa strategıasynyń barlyq áleýetin tıimdi paıdalanýdyń mańyzdylyǵyna mán berildi.
Qasym-Jomart Toqaev Aleksandr De Krooǵa Qazaqstanda júzege asyrylyp jatqan aýqymdy saıası jáne ekonomıkalyq reformalar týraly málimet berdi. Belgıa Premer-Mınıstri Qazaqstannyń EýroOdaqpen yntymaqtastyǵyn joǵary baǵalady.
Kezdesý sońynda Memleket basshysy Belgıa Premer-Mınıstrin Qazaqstanǵa resmı saparmen kelýge shaqyrdy. Aleksandr De Kroo elimizge kelýge qyzyǵýshylyq bildirdi.