Eń qoljetimdi mobıldi baılanys.
International Telecommunication Union (ITU) málimetterine sáıkes, Ortalyq Azıanyń basqa elderimen salystyrǵanda, eń qoljetimdi mobıldi baılanys Qazaqstanda kórinedi, dep habarlaıdy Almaty-akshamy.kz Finprom.kz silteme jasap.
Máselen, 2021 jyly Qazaqstandaǵy tarıf boıynsha uıaly baılanys shyǵyndary jan basyna shaqqandaǵy jalpy ulttyq tabystyń 1,04%-yn qurady. Qyrǵyzstanda bul kórsetkish 3,11%-dy quraǵan.
Qazaqstandaǵydaı uıaly baılanys shyǵyndarynyń deńgeıi Ózbekstanda (jan basyna shaqqandaǵy jalpy ulttyq tabystyń 1,14%-y) men Túrikmenstanda (1,17%) tirkelgen. Biraq ta, bul elderde mobıldi ınternettiń jyldamdyǵy Qazaqstanǵa qaraǵanda áldeqaıda tómen.
Resýrstyń habarlaýynsha, elimizde mundaı tarıftiń quny aıyna 2021 jyly ortasha eseppen 6,89 dollardy qurady (2,9 myń teńge). Bul el azamattarynyń shyǵyndarynyń 4,4%-yn ǵana alady. Budan bólek "RIA Novostı" derekterine sáıkes, elimizdegi úı sharýashylyqtary shyǵyndarynyń 53%-y tamaqqa ketedi.
Dúnıejúzilik banktiń dereginshe, 2021 jyly elimizdegi jan basyna shaqqandaǵy jalpyulttyq tabys 8720 dollardy qurady.
Jalpy álem boıynsha bul kórsetkish 12070 dollardy qurady.
Qazaqstanda mobıldi ınternettiń ortasha jyldamdyǵy osy jyldyń qazan aıynda 22,41 Mbıt/s-qa deıin artty.
Jalpy álem boıynsha mobıldi ınternettiń ortasha jyldamdyǵy bir jyl ishinde 28,54 Mbıt/s-tan 33,43 Mbıt/s-qa deıin ósti.