QR Energetıka mınıstri Bolat Aqsholaqov iri munaı-gaz-hımıa keshenderine arnalǵan ınvestısıalar týraly aıtty.
Bolat Aqsholaqov «KIOGE-2022» halyqaralyq munaı jáne gaz kórme-konferensıasy barysynda elimizdiń energetıka salasyn damytýdyń basym baǵyttarynyń biri munaı-gaz-hımıa salasy ekenin aıtty, dep habarlaıdy Almaty-akshamy.kz QazAqparatqa silteme jasap.
«Jýyrda Atyraý oblysynda qýaty 500 myń tonna bolatyn polıpropılen óndirý zaýyty iske qosylady. 2024 jyly Qashaǵan ken orny shıkizatynyń bazasynda qýaty 1 mlrd tekshe metr gaz óńdeý zaýytynyń qurylys aıaqtalady. Sonymen qatar, qýattylyǵy jylyna 1,2 mln tonna polıetılen jáne jylyna 186 myń tonna býtadıen óndirý jobalary ázirleý satysynda. Osy jobalardy júzege asyrý aıasynda 2025 jylǵa deıin shamamen 14 mlrd AQSH dollary kóleminde ınvestısıa tartylyp, 14 myńnan astam jumys orny ashylady», - dedi mınıstr.
Sondaı-aq ol Qazaqstan munaı qory men óndirý boıynsha álemde jetekshi oryndardyń birinde ekenin atap ótti. Qazaqstan qazirgi ýaqytta munaı qory boıynsha álemdegi 15 eldiń qataryna kiredi.
«30 jyl ishinde Qazaqstanda munaı óndirý 3,5 esege jýyq ósti – 1991 jylǵy 26,6 mıllıon tonnadan 2019 jyly 90,5 mıllıon tonnaǵa deıin. Munaı eksportynyń kólemi shamamen alty esege ósti. Osynyń arqasynda, OPEK+ derekteri boıynsha, Qazaqstan munaı eksporttaýshy 10 eldiń qataryna endi», - dedi Bolat Aqsholaqov.