Aýrýdyń aldyn alýdyń eń tıimdi ádisi – vaksınalaý.
Densaýlyq saqtaý vıse-mınıstri – Bas memlekettik sanıtarlyq dáriger Aıjan Esmaǵambetova OKQ brıfıńinde Qazaqstandaǵy tumaýdyń shtamdary týraly aıtty, dep habarlaıdy Almaty-akshamy.kz Egemen.kz silteme jasap.
Aıjan Esmaǵambetovanyń aıtýynsha, elde jyl saıyn tumaý vırýsynyń aınalymy qarasha aıynan bastalyp, sáýir aıynyń ortasyna deıin sozylady.
«DDU málimetteri boıynsha aldaǵy epıdemıalyq maýsymda vırýstyń úsh shtamy ózekti bolady, olar A (H1N1), A (H3N2) jáne B»,- dedi Bas memlekettik sanıtarlyq dáriger.
Ol ótken jyly JRVI-men 3,9 mln adam aýyrǵanyn jáne 2019-2020 jylǵy epıdemıologıalyq maýsymmen salystyrǵanda respýblıka boıynsha syrqattaný 1,3 ese óskenin aıtty. Ósim Qaraǵandy oblysyn qospaǵanda, barlyq óńirlerde baıqaldy. Naýqastardyń 80%-y balalar men jasóspirimderge tıesili.
«Sonymen qatar jyl saıyn aınalymdaǵy shtamdar ózgerip otyratyny baıqaldy. Ótken maýsymda tumaý vırýsynyń 2 shtamy – A (H3N2) jáne B aınalymda boldy, barlyǵy 915 tumaý jaǵdaıy anyqtaldy, júıeleý nátıjeleri boıynsha shtamdar vaksınalyq shtamdarǵa sáıkes keldi», - dep qosty vıse-mınıstr.
Qazaqstanda tumaýdan bólek basqa da vırýstar anyqtaldy. Ótken maýsymda barlyǵy 10 myńnan astam úlgi zertteldi, olardyń ishinde rınovırýs, MS vırýsy, adenovırýstyq ınfeksıa, paragrıpp, metapnevmovırýs, bokavırýstyq ınfeksıa anyqtaldy.
Bas sanıtarlyq dáriger aýrýdyń aldyn alýdyń eń tıimdi ádisi vaksınalaý ekenin atap ótti.