Qazaqstan Syrtqy ister mınıstriniń birinshi orynbasary Qaırat Omarov pen AQSH Memlekettik hatshynyń Ońtústik jáne Ortalyq Azıa isteri jónindegi kómekshisi Donald Lýdyń teń tóraǵalyǵymen Keńeıtilgen strategıalyq seriktestik komısıasynyń (KSSK) kezekti otyrysy ótti, dep habarlaıdy Almaty-akshamy.kz.
Bul týraly QazAqparat QR Syrtqy ister mınıstrliginiń baspasóz qyzmetine silteme jasap habarlaıdy.
Baspasóz qyzmetiniń málimetinshe, syndarly jáne senimdi pikir almasý barysynda taraptar 2022 jyldyń birlesken jumystarynyń qorytyndylaryn qarastyryp, Qazaqstan Respýblıkasy men Amerıka Qurama Shtattary arasyndaǵy keńeıtilgen strategıalyq seriktestikti odan ári damytý josparlaryn belgilep, saıasat, qaýipsizdik, saýda jáne ınvestısıa, sondaı-aq adamı ólshem salalaryndaǵy ekijaqty basymdyqtarynyń ortaqtyǵyna nazar aýdardy.
Qazaqstandyq dıplomat Prezıdent Qasym-Jomart Toqaevtyń «Ádiletti Qazaqstandy» qurý jónindegi kún tártibindegi mindetterdi keshendi túrde júzege asyrýdy qamtamasyz etýdegi tabandylyǵyn atap ótti. Óz kezeginde amerıkalyq tarap Qazaqstandaǵy demokratıalyq reformalarǵa praktıkalyq kómek kórsetýge degen nıetin qýattady.
Taraptar Djekson-Venık túzetýinen bas tartýdyń jáne Qazaqstan men Amerıka Qurama Shtattary arasynda turaqty qalypty saýda qatynastaryn ornatýdyń mańyzdylyǵyn atap ótti, bul saýda-ınvestısıalyq yntymaqtastyqty damytýǵa aıtarlyqtaı serpin beredi.
Komısıa jumysynyń qorytyndylary boıynsha taraptar KSSK Birlesken málimdemesin qabyldady.
Q.Omarovtyń sapary barysynda AQSH Memlekettik departamenti men Ulttyq qaýipsizdik keńesiniń basshylyǵymen ótken kezdesýler eki el arasyndaǵy saıası dıalogty jandandyrýǵa eki jaqtyń da umtylysyn atap ótti.
AQSH Memlekettik hatshysynyń Halyqaralyq qaýipsizdik jáne ıadrolyq qarýdy taratpaý jónindegi kómekshisi Elıot Kangpen jáne Energetıka mınıstriniń kómekshisi Endrú Laıtpen ótken kelissózder taraptardyń jahandyq energetıkalyq qaýipsizdikti qamtamasyz etý, atom energetıkasyn damytýdaǵy turaqtylyq jáne ıadrolyq qarýdy taratpaý rejımin qamtamasyz etýdegi praktıkalyq ózara is-qımylyna arnady. Taraptar halyqaralyq uıymdar men rejımder sheńberinde kúsh-jigerdi úılestirýdiń mańyzdylyǵy týraly kelisti, sondaı-aq Memleket basshysynyń Halyqaralyq bıoqaýipsizdik agenttigin qurý týraly bastamasyn júzege asyrýdyń tásilderin egjeı-tegjeıli talqylady.
Q. Omarovtyń AQSH Saýda ókiliniń kómekshisi Krıstofer Ýılsonmen kezdesýi qazaqstandyq taýarlardyń amerıkalyq naryqqa qol jetkizýin qamtamasyz etý, zıatkerlik menshik quqyǵyn qorǵaý, sıfrlyq komersıany damytý máselelerin talqylaýǵa múmkindik berdi.
Kongrestiń Ókilder palatasy Halyqaralyq ister komıteti tóraǵasynyń orynbasary Maıkl Makkollmen kezdesýde taraptar strategıalyq seriktestikti arttyrý úshin parlamentaralyq baılanystardyń mańyzdylyǵyn atap ótti.
Sapar barysynda qazaqstandyq dıplomat Djordj Vashıngton ýnıversıtetinde ótken «Ortalyq Azıa: XXI ǵasyrdaǵy energıa kózi» zertteýiniń tusaýkeserinde de bas spıker boldy.