Qazaqstan jahandyq básekege qabilettilik reıtıńinde 35-shi orynǵa ıe boldy.
Qazaqstannyń Nıderlandydaǵy Elshisi Asqar Jumaǵalıev Koróldik ındýstrıalyq klýb múshelerin ınvestısıalaý úshin qyzyqty sektorlarmen, sondaı-aq memlekettiń odan arǵy damý baǵyty jónindegi josparlarymen tanystyrdy, dep habarlaıdy Almaty-akshamy.kz QazAqparatqa silteme jasap.
Dıplomat Qazaqstan bıznes úshin kúshti jáne básekege qabiletti orta qurýǵa erekshe nazar aýdaratynyn atap ótti. Óz sózin rastaý retinde ol jahandyq básekege qabilettilik reıtıńisin mysalǵa keltirdi, onda Qazaqstan 35-shi orynǵa ıe boldy.
«Dúnıejúzilik banktiń sońǵy esebine sáıkes, Qazaqstan bıznes júrgizý boıynsha 190 eldiń ishinde 25-shi orynda», - dedi A.Jumaǵalıev.
Elshi salyq jeńildikteri týraly habarlap, áleýetti ınvestorlardyń nazaryn aýdardy.
«Men buryn aıtyp ótken qarjylyq jáne ekonomıkalyq turaqtylyqtan basqa, el túrli salalarda jan-jaqty memlekettik qoldaý usynady. Biz korporatıvti tabys salyǵynan, jer salyǵynan, múlik salyǵynan bosatý jáne fıskaldyq emes yntalandyrý: jer ýchaskesi men ınfraqurylym sıaqty salyqtyq jeńildikterdi qamtıtyn ınvestısıalyq jobalarǵa qoldaý kórsetemiz», - dedi ol.
Dıplomat sondaı-aq ınfraqurylym men ınvestısıalyq preferensıalardyń keń spektrin usynatyn búkil Qazaqstan boıynsha ornalasqan 13 arnaıy ekonomıkalyq aımaq, 36 ónerkásiptik aımaq týraly aıtyp ótti. A.Jumaǵalıev atap ótkendeı, Qazaqstanda Eýrazıalyq ekonomıkalyq odaq elderin, Qytaı men Kaspıı baseınin qosa alǵanda, mıllıardtan astam tutynýshylardyń naryqqa tikeleı qoljetimdiligi bar. Sonymen qatar, elde kólik ınfraqurylymy jaqsy damyǵan.
«Meniń oıymsha, bul sebepter Qazaqstannyń ınvestorlar úshin nelikten tartymdy ekenine jaýap bola alady. Sondyqtan Nıderland Qazaqstandaǵy birinshi nómirli sheteldik ınvestor dep oılaımyn. Patshalyq bizdiń elge 105 mıllıard dollardan astam ınvestısıa saldy», - dep túıindedi ol.
Koróldik klýb músheleri preferensıalardan basqa, kadr máseleleri, aǵylshyn tilin meńgerý deńgeıi, Qazaqstannyń klımattyq erekshelikteri jáne elde júrgizilip jatqan reformalar týraly alańdady. Asqar Jumaǵalıev referendým, ony ótkizý nátıjeleri jáne Konstıtýsıaǵa engiziletin túzetýlerge ákep soqtyratyn ózgerister týraly da habardar etti.