Qazaqstan elektr energıasyn memleketaralyq berýdi rettemekshi
Parlament Májilisiniń depýtattary 2014 jylǵy 29 mamyrdaǵy Eýrazıalyq ekonomıkalyq odaq týraly shartqa Armenıa Respýblıkasy men Qyrǵyz Respýblıkasynyń qosylýyna baılanysty ózgerister engizý týraly hattamalardy ratıfıkasıalaý týraly eki zań jobasyn qarady. Hattamalar múshe memleketter arasynda elektr energıasyn (qýatyn) memleketaralyq berýdi júzege asyrýdyń ádisnamasyn aıqyndaıdy, dep habarlaıdy Almaty-akshamy.kz. QR EM baspasóz qyzmetiniń habaryna silteme jasap.
Energetıka mınıstri Nurlan Noǵaev atap ótkendeı, hattamalardy ratıfıkasıalaý Armenıa men Qyrǵyzstannyń qosylýyn eskere otyryp, Odaqqa múshe memleketterdiń energıa júıeleriniń tıimdi jumys isteý múmkindigin qamtamasyz etedi.
Baǵa belgileý jáne tarıftik saıasat negizderin qosa alǵanda, elektr energetıkasy salasyndaǵy tabıǵı monopolıalar sýbektileriniń kórsetiletin qyzmetterine qol jetkizýdi qamtamasyz etý týraly hattamaǵa Armenıa men Qyrǵyz Respýblıkalarynyń qosylýyn eskere otyryp, EAEO-ǵa múshe memleketter arasynda elektr energıasyn (qýatyn) memleketaralyq berýdi júzege asyrý halyqaralyq sharttyń retteý nysanasy bolyp tabylady.
Búgingi tańda hattamalardy Armenıa, Belarýs, Qyrǵyz Respýblıkalary jáne Reseı ratıfıkasıalady.
Armenıa 2014 jylǵy 10 qazanda qol qoıylǵan Armenıa Respýblıkasynyń qosylýy týraly shart sheńberinde barlyq múshe memleketter ratıfıkasıalaǵan Eýrazıalyq ekonomıkalyq odaq týraly shartqa qosyldy. 2015 jylǵy 2 qańtarda Armenıa Odaqtyń teń quqyly múshesi boldy.
Qyrǵyz Respýblıkasy 2014 jylǵy 23 jeltoqsanda qol qoıylǵan Qyrǵyz Respýblıkasynyń qosylýy týraly shart sheńberinde barlyq múshe memleketter ratıfıkasıalaǵan Eýrazıalyq ekonomıkalyq odaq týraly shartqa qosyldy. 2015 jylǵy 12 tamyzda Qyrǵyz Respýblıkasy Odaqtyń teń quqyly múshesi boldy.
Májilis depýtattary zań jobalaryn maquldady.