Bıyl geosaıası jaǵdaıǵa baılanysty álemdik naryqta bıdaıǵa suranys joǵary.
Qazaqstan astyq eksporty boıynsha Eýropa Odaǵy elderiniń jańa naryqtaryna shyǵý joldaryn pysyqtap jatyr. Bul týraly Aýyl sharýashylyǵy mınıstrliginen málim boldy, dep habarlaıdy Almaty-akshamy.kz QazAqparatqa silteme jasap.
«Qazaqstandyq bıdaı men unnyń dástúrli ımporttaýshylary retinde Ortalyq Azıa elderi men Aýǵanstan sanalady. Mınıstrlik Qytaıǵa, Kavkaz elderine (Ázirbaıjan, Grýzıa), Pákistanǵa, Túrkıaǵa, Iranǵa eksport kólemin ulǵaıtý, sondaı-aq EO naryqtaryn ashý boıynsha tıisti jumys júrgizip jatyr», - dep atalyp ótken atalǵan vedomstvonyń QazAqparat agenttigine bergen jaýabynda.
Bıyl negizgi bıdaı óndirýshiler bolyp sanalatyn Reseı men Ýkraınadaǵy geosaıası jaǵdaıǵa baılanysty álemdik naryqta bıdaıǵa suranys joǵary.
«Bul faktor qazaqstandyq bıdaı men un eksportynyń ulǵaıýyna áser etti. Statısıka derekterine sáıkes, 2022 jylǵy qańtar-naýryzda bıdaı eksporty 2 025 myń tonnany qurady, bul ótken jyldyń osy kezeńimen salystyrǵanda 1,6 ese artyq (2021 jylǵy qańtar-naýryz – 1 240 myń tonna). Osy jylǵy 8 shildedegi jaǵdaı boıynsha eksport 3035,5 myń tonnany qurady. Un boıynsha da osyndaı jaǵdaı, 2022 jyldyń qańtar-naýryz aılarynda 468 myń tonnasy eksporttaldy. Bul ótken jyldyń osy kezeńimen salystyrǵanda 35,6 paıyzǵa artyq (2021 jylǵy qańtar-naýryz – 345 myń tonna). Bıylǵy 8 shildedegi jaǵdaı boıynsha eksport 784,7 myń tonnaǵa jetti. Osy oraıda engizilgen shekteý sharalaryna qaramastan, bıyl dástúrli túrde ónim ótkiziletin naryqtarda bıdaı men un eksportynyń qarqyny saqtalady», - dep atalyp ótken ASHM málimetinde.