Tasymaldaý jaǵy artýda
Qazaqstan arqyly konteınerlik tasymal kólemi artty, dep habarlaıdy Almaty-akshamy.kz.
Bıyl 450 myń konteıner naryqqa jiberilgen. Naqtyraq sońǵy 8 aıda Qytaıdan Eýropa baǵytynda Qazaqstan aýmaǵymen osynshama kólemde júk tasymaldanǵan. Eýrazıalyq damý banki sarapshylarynyń pikirinshe, bul seriktes memleketterdiń kólik-logıstıka salasyndaǵy is-qımyldarynyń júıege qoıylǵanyn kórsetedi. Bul baǵyt boıynsha konteınerlik tasymaldyń basty artyqshylyǵy – ýaqytynda júk jetkizý. Taýar Eýropaǵa nebári eki aptada jetedi. Al teńiz joldarymen buǵan bir aıdan asa ýaqyt qajet. Osy rette Qazaqstan aýmaǵymen ótetin Ortalyq-Eýrazıalyq kólik dálizine suranys joǵary. Pandemıa qyzyp turǵan 2020 jyly Eýrazıalyq ekonomıkalyq odaq elderiniń aýmaǵymen temirjol tasymaly 60% astam ósken.
Aldaǵy ýaqytta Odaq elderi arqyly júk aǵyny kem degende úsh ese artady, dep esepteıdi sarapshylar. Seriktes-memleketterdiń temirjol kompanıalarynyń bul saladaǵy tabysynyń jıyntyq kólemi jylyna 10 mlrd dollarǵa jetýi múmkin.
EADB ıntegrasıalyq zertteýler ortalyǵynyń jetekshisi Taras Sýkarev tranzıttik konteıner aǵymyn arttyrý kerektigin aıtty.
«Fıtıngtik platformalar parkin jańartyp, ulǵaıtý qajet. Bul tranzıttik konteıner aǵymyn arttyrýǵa jaǵdaı jasaıdy. Menińshe, Eýrazıalyq ekonomıkalyq odaq elderine Túrksib sıaqty ekinshi megajobanyń qajeti joq. Tek kólik ınfraqurylymynyń tar núktelerin keńeıtý jaǵyn sheshý kerek», - dedi ol.