Toqaev kedendegi bylyqtardy sheshý úshin Úkimetke 10 kún berdi
QR Prezıdenti Qasym-Jomart Toqaev Úkimettiń keńeıtilgen otyrysynda logıstıka salasyna halyqaralyq kompanıalardy tartý qajettigin aıtty , dep habarlaıdy Almaty-akshamy.kz QazAqparatqa silteme jasap.
«Keden beketterindegi qordalanǵan máselelerdi jedel sheshý qajet. Bul - búdjet úshin aıryqsha mańyzy bar sala. Taǵy da qaıtalap aıtam, ondaǵy bylyqty jónge keltirmese, saldary qıyn bolýy múmkin. Qytaıdyń statısıkasy men bizdegi kórsetkishtiń aıyrmasy 5,7 mlrd dollar bolýy - sonyń dáleli. Qazir Qytaımen aradaǵy keden beketinde 12 myńnan astam kólik elektrondy kezekte tur. Quzyrly ekonomıkalyq operatorlardyń zańsyz is-áreketi týraly buǵan deıin de aıttym. Olar kedennen jáne basqa da baqylaý organdarynan sonshama jeńildikti qalaı alyp otyr? Ne sebepti bul másele nazardan tys qalǵan? Bul suraqtarǵa 10 kúnniń ishinde naqty ári tolyq jaýap kútemin», - degen Memleket basshysy salanyń qyzmetin zań boıynsha qatań retteýdi tapsyrdy.
Sondaı-aq ol keden men logıstıka salasyndaǵy problemalardy halyqaralyq oıynshylardy tartý arqyly sheshýge bolatynyn atady.
«Jalpy, keden jáne logıstıka júıesine iri halyqaralyq kompanıalardy tartýdy oılastyrǵan jón. Olar qajetti tasymal kólemin jáne jumystyń ashqyq ári esepti bolýyn qamtamasyz ete alady. Bul másele Úkimette talqylandy. Úkimetke ony taǵy da pysyqtap, maǵan baıandaýdy tapsyramyn», - dedi Prezıdent.