Memleket basshysy Almaty qalasyna jumys saparynyń sońynda «Alatau Creative Hub» ınovasıalyq ortalyǵyna bardy
Nysan «Shetsiz qala» strategıasyn júzege asyrý aıasynda byltyr jeltoqsan aıynda ashylǵan, dep habarlaıdy Almaty-akshamy.kz
Ortalyqta kompúterlik baǵdarlamalardy jasaýdy úırenýge, kreatıvti ındýstrıany damytýǵa, shyǵarmashylyq áleýet pen vırtýaldy ónerdi damytýǵa múmkindik bar. Jalpy munda túrli baǵyttar boıynsha 25 úıirme tegin jumys isteıdi.
Prezıdentke kitaphana, balalardyń oıyn alańy, vokal stýdıasy, IT zerthana, elektr tehnıkasy men robot tehnıkasy zaldary, dástúrli mýzykaǵa arnalǵan mýltımedıa ortalyǵy tanystyryldy.
Budan bólek Memleket basshysyna sıfrlandyrý quraldaryn qoldanýǵa, kreatıvti ındýstrıany damytýǵa arnalǵan prezentasıalar kórsetildi.
Almaty qalasynyń ákimi Baqytjan Saǵyntaev Prezıdentke qalanyń kólik júıesin damytý jóninde baıandady.
Qasym-Jomart Toqaev ortalyq qyzmetkerlerimen jáne onda kelýshilermen áńgimelesip, sýretke tústi, sondaı-aq olardyń jumysyna tabys tiledi.
