Almatyda onlaın Qurban aıt aıasynda 800 muqtaj otbasyna qoldaý kórsetildi.
Búgin qazaqstandyqtar Qurban aıt merekesin atap ótýde. Almatyda koronavırýstyq ınfeksıanyń órshýin eskere otyryp, barlyq is-sharalar onlaın rejıminde ótkiziledi. Qala turǵyndary qurbandyq shalýdy onlaın rejımde qurban2021.kz veb-saıtyna ótinish bere otyryp, júzege asyra alady, dep habarlaıdy Almaty-akshamy.kz
Saıt arqyly musylman qaýym qashyqtan qurbandyq shalyp, muqtaj jandarǵa bólip bere alady. Búgingi kúnge deıin almatylyqtar onlaın-qurbandyq shalýǵa 300-den astam ótinish jiberdi.
Ótinishter 22 shilde kúngi saǵat 14.00-ge deıin qabyldanady. Alataý aýdany Beket Ata meshitiniń bas ımamy Mádı Ahmetov Almaty turǵyndaryna arnap sóz sóılep, qurban shalý rásimin qashyqtan ótkizý sharıǵat zańdaryna sáıkes keletindigin atap ótti.
«Sharıǵat zańdary boıynsha, musylman basqa musylmanǵa onyń atynan bir nárse jasaýǵa, onyń ishinde qurbandyq shalýǵa ruqsat berýge quqyly. Birde paıǵambar Hakim ıbn Hızamǵa óziniń atynan qurbandyq shalýdy buıyrdy. Osy jaǵdaıdan qurbandyq shalýdy ýákiletti adam arqyly jasaýǵa bolatyny túsinikti », - deıdi Beket ata meshitiniń bas ımamy.
Almaty qalasy aýmaǵynda ınfeksıanyń aldyn alý úshin 19-22 shilde aralyǵynda mal soıý sehtary men bazarlarynyń jumysy (sonyń ishinde tiri túrinde), sonymen qatar mal soıý, tiri maldy avtokólikterden jáne jeke úı sharýashylyqtarynan satýǵa tyıym salynady, onlaın-qurbandyqqa mal Almaty qalasy ortalyq meshitinen belgilenedi.
Onlaın ótinishter oryndalǵannan keıin, ótinish bergen 800-ge jýyq muqtaj otbasylaryna qurbandyqqa shalynatyn maldyń eti beriledi. 20 shildedegi saǵat 10-nan bastap 50-ge jýyq usaq mal qurbandyqqa shalynyp, 225 otbasyǵa et taratyldy. Barlyǵy 800 adam qurbandyqtyń etin alýdy surady. Onlaın qurbandyqtyń bir bóligi retinde qurbandyqqa shalynatyn maldyń etin muqtajdarǵa úlestirý kezinde tez buzylatyn ónimdi tasymaldaý men saqtaýdyń sanıtarlyq-epıdemıologıalyq erejeleri talaptarynyń saqtalýy tolyǵymen qamtamasyz etiledi.
Esterińizge sala keteıik, musylmandardyń meıramy Qurban aıt Oraza aıt merekesi aıaqtalǵannan keıingi 70-shi kúnge sáıkes keledi. Aı kúntizbesi boıynsha esepteý jyl saıyn 10 kúndik aıyrmashylyqpen ózgeredi. Arab tilinen aýdarǵanda merekeniń ataýy «Qurbandyq shalý merekesi» degendi bildiredi.