Sanıtarlyq-epıdemıologıalyq shekteýler qoldanylady.
Almatyda qaýipti indettiń órshýine baılanysty 2021 jyly Qurban aıt merekesi onlaın túrde ótedi. Merekede ujymdyq namaz oqylmaıdy, ımamdar úıde namaz oqýdy usyndy, dep habarlady Almaty-akshamy.kz.
"Báıken" meshitiniń naıb ımamy Nurbolat Dúısebaevtiń aıtýynsha, bul sheshim epıdemıologıalyq jaǵdaıdyń ýshyǵýyna baılanysty ekenin málimdedi. Qurban aıtqa qurbandyq shalý qyzmetine onlaın tapsyrys berýge bolady.
"qurban2021.kz saıtynda qurbandyq shalý qyzmetine tapsyrys berýge bolady. Bul jerde óńirdi mysaly, Almaty qalasyn tańdap, kimniń atynan jasalatyn baǵandy toltyrý arqyly óz telefon nómirińizdi kórsetý qajet. Sodan keıin esep jiberiletin bolady. Qurbandyq shalý tapsyrys berýshiniń atynan namaz oqýmen ótedi", – dedi Nurbolat Dúısebaev.
Qurbandyq shalýǵa arnalǵan janýardyń baǵasy Qazaqstan boıynsha shekti bolyp belgilengen: usaq maldy 70 myń teńgeden, al iri qara maldy 420 myńǵa deıin satýǵa ruqsat etilgen.
"Báıken" meshitiniń naıb ımamy bıylǵy jyly onlaın formatta ótetin Qurban aıt merekesiniń sebebin túsindirdi.
"Búginde koronavırýs juqtyryp, aýrýhanaǵa jatqyzylǵan adam kóp. Sondyqtan ujymdyq is-shara ótkizýge tyıym salynady. Sanıtarlyq-epıdemıologıalyq shekteýler qoldanylady. Bul mereke kúnderin otbasyńyzben ótkizgen durys, qabyldanǵan talaptarǵa túsinistikpen qaraý kerek", – dep keńes berdi Nurbolat Dúısebaev.
Almatyda 18 shilde kúni koronavırýs ınfeksıasyn juqtyrǵan 798 jaǵdaı tirkeldi. Sonyń 706-sy sımptomsyz jáne 92-si sımptomdy.
Infeksıalyq stasıonarlarda 2 878 adam bar, sonyń 209-y bala.